Mynta yn sdang ka jingïakren pynbeit pud ka Sorkar Megh-Assam ha ka wat kaba ar

Shillong, Jymmang, 23: Ka jingïapynbeit pud hapdeng ka Sorkar Meghalaya bad ka Sorkar Assam na ka bynta ka wat kaba ar kan sa long mynta ka sngi Balang ha State Guest House, Koinadora, Assam.
Katkum ka jingpyntip jong ka Ophis u Myntri Rangbah, ha kane ka jingïakren pynbeit pud ka ban sdang ha ka por 11:00 baje mynstep yn ïashim bynta da u Myntri Rangbah ka Meghalaya u Conrad K. Sangma bad u Myntri Rangbah ka Assam u Himanta Biswa Sarma, nalor ki ophisar jong kine ki ar tylli ki jylla.
Ki jaka ba ïakajia pud ki ban ïapynbeit ha kane ka wat kaba ar ki long ka Khanduli bad Psiar, ka Block 1 bad Block 2, ka Borduar, ka Langpih, ka Nongwah-Mawtamur bad Desh Doomreah.
Kum ban shu pynkynmaw, ka Sorkar Meghalaya bad ka Sorkar Assam ki ladep ïasoi ïa ka Memorandum of Understanding ha ka jingïapynbeit pud ha ka wat kaba nyngkong na ka bynta ki hynriew tylli ki jaka kiba don hapdeng ka jingïakajia pud kiba kynthup ïa ka Hahim, Gizang, Tarabari, Boklapara, Khanapara-Pillingkata bad Ratacherra.
Katkum ka khubor ba la ïoh lum la ïathuh ba ka Jylla Meghalaya ka la ïoh 18.2 sqkm na ka 36.79 sqkm ki jaka ba don ka jingïakajia pud ha ka jingïapynbeit pud ha ka wat ba nyngkong katba ka Assam kan ïoh 18.5 sqkm.