Balei hap ban thung ïa ka Regional Planning Board haba la don ka State Planning Board kylli ka HYC

Shillong, Jymmang 23 : Ka Hynniewtrep Youth Council (HYC) mynta ka Sngi Ba Ar ka la buh kylli ïa ka sorkar MDA ba la ïalam da ka NPP balei ban dang hap ban thung sa ïa ka Regional Planning and Development Board (RPDB) na ka bynta ka ri lum Khasi bad Garo haba ka la don lypa ka Meghalaya State Planning Board (MSPB).
“ Haba ka jylla ka la don ka Meghalaya State Planning Board (MSPB) balei pat dang donkam ban thaw sa ïa ka Regional Planning and Developemnt Board (RPDB) naka bynta ka ri lum Khasi bad Garo. Ka MSPB ka don 10 haduh 15 ngut kid khot kiba ym dei ki ophisar sorkar hynrei kiba dei ki dkhot ne nongïalam jong ki seng saiñ pyrthei kiba ïasynrop lang bad ka sorkar. Ngi tip shai ba kane ka jingthaw ïa ka RPDB ka dei tang ka jingpynsyrwa kai ïa ka pisa u paidbah” ong u General Secretary ka HYC u bah Roykupar Synrem haba ïakren bad ki lad pathai khubor.
Ka HYC kala buh jingkylli ruh ïa ka rai jongka sorkar ban thung da ki MDC ban khlieh ïa ka RPDB katba mynshwa ïa kane ka shuki la bat da ki Myntri sorkar. Ka la ong kumno ki MLA bad ki Myntri sorkar kin leit sha kata ka jingïalang ban khlieh da ki MDC namar kam ïahap kyrdan (protocol) shuh.
U bah Synrem u la ong ba u Myntri Rangbah u Conrad K Sangma u la ai jingthoh sha u Commissioner bad Secretary ba peit ïa ka tnad Planning ha ka 27 tarik Iaiong 2022 ha kaba u la bthah ban thung ïa u bah Bajop Pyngrope kum u Chairman ka RPDB na ka bynta ka Khasi Hills bad ïa u Rakesh K Sangma kum u Chairman ka RPDB na ka bynta ka ri lum Garo ha ki jingsiew kaba ha ka Category A.
U la ong ha u 2004 ka sorkar hapoh ka jingïalam u Dr D.D Lapang ka la thung ïa kine ki ar tylli ki RPDB.
Hynrei ka jingiapher pyntreikam ha ka por jong u Dr Lapang bad u Conrad ka dei ha ka por jong u Dr Lapang ki Chairman jong kine ki RPDB ki dei ki Mytnri sorkar bad ha kato ka por na ka bynta ka ri lum Khasi la khlieh da u Dr Donkupar Roy uba dei u Symbud Myntri Rangbah bad na ka bynta ka ri lum Garo la khlieh da u Dr Mukul Sangma uba long u myntri sorkar” ong u bah Synrem.
“ Kat kum ki kot ki sla na ka tnad Planning u bah Bajop Pyngrope uba dei u MDC ha ka por ba u pynïasoh bad ka NPP ha ka 31 tarik Lber 2022 u la ïoh ïa kane ka shuki Chairman ha ka 27 tarik Iaiong 2022 tangba khlem da don kiwei pat ki dkhot kane ka Board. Ym shym la thung dkhot ïano ïano ruh. Ym don jingïalang wat tang kawei ruh haduh mynta ym don kano kano ka jingtreikam bad jingai jingmut hynrei la shu thung Chairman beit ïa u. Ka long ruh kumjuh ia u Rakesh K Sangma. Ngi tip ruh ba u don hapdeng kiba bun ki kynrum kynram kat haduh ba la hap ban phah hiar ïa u na ka shuki CEM ka GHADC hynrei dang thung pat ïa u kum u Chairman ka RPDB”.
Ka HYC ka la kynnoh ruh ba u bah Bajop Pyngrope u la ai jingkheiñ ruh haduh 6 lak sha ka RPDB shwa ka election MLA 2023 katba u Rakesh pat haduh mynta um pat ai jingkheiñ ïa ki jinglut jingsep jongu.
Shuh shuh la ong ba ha u 2004 haba u Myntri Rangbah Dr D.D Lapang u la thung Chairman jong ki RPDB ym shym la don jingthoh ba ki Chairman kin ïoh jingsiew namar ki la dei lypa ki myntri sorkar. Kumta kane ka dang don nongrim hi. Hynrei mynta ngi ïohi ba baroh kine ki rukom thung Chairman ne Co Chairman, Vice Chairman ka dei tang ban pynsngewbha bad pynhun ïa ki seng saiñ pyrthei bad ban myntoi ma ki shimet ym ban shakri ïa ki paidbah katba ïa ka jinglut jingsep bad jingsiew ïa ki la hap ban sei na ka pla ki paidbah. Ka sorkar ka shu pynsyrwa ei ban siew sha ki khlem kano kano ka jingshakri ïa ki paidbah ka jylla kumta u la ong ka sorkar ka dei ban pynsangeh noh mardor ïa kine ki jingpynlut phut ïa ka pisa u paidbah bad pynsangeh ïa kane ka rukom thung Chairman ong u bah Synrem.