Shillong, Jymmang, 23: Ki nongïalam jong ka Catholic Association of Shillong (CAS) bad ka Dorbar Shnong Mawkhar ha ka sngi Baar ki la aiti da ka song pisa kum ka jingïarap sha ka School Managing Committee jong ka KJP Girls’ Higher Secondary School, Shillong khnang ba ka Committee kan dup lah ban tei thymmai biang ïa ka skul kaba la shah bamduh ha ki thylliej ding ha ka step sngi u Blei mynta ka taïew.
Ïa ka song pisa la aiti sha ka Principal jong ka skul ka Kong C. Alya hapoh ka jingïalam jong u Rangbah Shnong u Bah Arwan Tariang, ryngkat ka jingsynran lang jong u Assistant Rangbah Shnong u Bah Ransom Sutnga katba na ka Catholic Association of Shillong la ïalam da u Vicar General ka Shillong Archdiocese u Rev. Fr. Richard M. Majaw ryngkat ka jingdon lang jong u President bad ki dkhot ka Association bad ha kajuh ka por ki la aiti ruh ïa ka shithi sngewlem na u Archbishop ka Shillong Arcdiocese u Most Rev. Victor Lyngdoh.
Dang shen u Myntri Rangbah ka Jylla u Conrad K. Sangma uba la leit jngoh hi da lade ïa ka jingbamduh jong ka ding ïa ka ing skul baroh kawei, u la pynbna ban ai jingïarap T.1 klur na ka Chief Minister Special Development Fund (CMSDF) khnang ba ki bor pynïaid kin dup lah ban tei noh da ka ing skul kaba thymmai.
