Shillong, Jymmang 23: Ka kynhun ki nongdie dohkha ha rilum Khasi bad Jaintia hapoh ka shatri ka Khasi Jaintia Fish Wholesalers and Retailers Association (KJFWRA) ha ka sngi Ba-ar ka la kyntait war ba ka don ka jingkhleh dawai formalin ha ki dohkha ba wanrah sha ka jylla na Andra Pradesh bad ong ruh ba kane ka jingkynnoh ka dei ka jingkynnoh ba lamler khlem ki jingshisha.
Haba kren bad u Mawphor u Secretary ka KJFWRA u Bah D Marbaniang u la ong ba ki dohkha shuwa ban wanrah sha ka jylla la ju test shuwa na Andra Pradesh ban pynthikna ba ki long kiba bit ban bam.
“Ka jingmih ka khubor ha u Mawphor ba don iwei iba ujor nga kwah ban ong ba kadei kaba bakla namar lada dei ba khleh formalin la dei ban lap naduh na Andra namar ïa ki dohkha shuwa ban rah shane la eksamin lupa bad khlem don syrnot ba la dep ban eksamin ym lah hi ban wanrah sha ka jylla. Na ka liang ka tnat Commissionerate of Food Safety ka ju wan ban shim nongmuna ïa ki dohkha ban phah test bad kim ju lap ba ka don kaba kum kata bad dang mynta hi u bnai na ka liang ka Commissionerate of Food safety ka wan shim nongmuna bad lada dei ba don jingkhleh formalin hato phin pyrkhat kan ai lad ba ngin die,” u la ong.
Haba bynrap lang ïa kane u Bah Kynsai wankhar u la ong, “Ngi ruh ngi bam dohkha kaba wanrah na Andra bad kiba ha iing ha sem ruh phi pyrkhat lada kam long kaba shngaiñ ngin kwah mo ban ai bam ïa ki da ka dohkha kaba kum kata, na kata ka daw nga kwah ban kren shai sha ki paidbah ba kim dei ban tieng ban bam dohkha namar ka long kaba shngaiñ.”
“Lada phi ïoh kaba kum kata ka dohka ba sma dawai kumba don ba kynnoh sngewbha leit ban ai ïa kata ka nongmuna sha ka Commissionerate of Food safety ba kan eksamin ka long ne em ban bam ym ban shu kynnoh tang ha ki lad pathai khubor khlem ki jingshisha,” u la bynrap.
