Shah khang khyrdep san tylli ki dukan die sha ki bar jylla naduh ïew Polo haduh 4th Furlong

Shillong, Jymmang, 23: San tylli ki dukan die sha jong ki bar jylla kiba don ha ïew Polo ter ter haduh 4th Furlong, Shillong ki la shah khang khyrdep ha ka sngi Baar hadien ba Khasi Student Union (KSU) Shillong Mihngi Circle ka la pynlong ïa ka jingkhynra ïa kine ki dukan die sha na ka jingïoh ujor na kiba bun ki paidbah ba bun tylli ki dukan die sha ba la pynïaid da ki bar jylla ha ka thaiñ Polo ki long kiba lehsih bad leh jaboh haduh katta katta.
Ha kane ka jingkhynra, ïa ka Khasi Students Union Shillong Mihngi Cirle la ïalam da u Organising Secretary u samla Banjop Dkhar, katba na ka liang jong ka tnat Labour la mihkhmat da ka Labour Inspector kaba khmih ïa ka Shillong City ka Kong Eva War bad na ka Shillong Municipal Board la mihkhmat da u Bah Shem Kharlor bad u Bah Mathew Syiem.
Khnang ba kane ka jingkhynra kan long kaba ïaid beit khlem kano kano ka huri hura, la synran lang ïa ki dkhot ka KSU da ki Pulit jong ka Nongmensong Out Post hapoh ka jingïalam jong ka Officer Incharge ka Kong Jyoti Wahlang bad ka Deputy Superintendent of Police Crime-2, East Khasi Hills District ka Priyanka Sangma.