Shillong, Ïaiong 02 : Ki la don haduh palat 307 tylli ki Utilisation Certificate (UC) kaba la kot sha ka 2,373 klur tyngka ba ki tnad bapher bapher jong ka sorkar jylla kim pat phah naduh u snem ba la dep.
“….haduh ba kut jong u Lber 2022, haduh 307 tylli ki UC ba kot sha ka 2,373.51 klur tyngka ki la sahkut ha ka thup jong u Principal Accountant General (A&E) Meghalaya,” ong ka kaiphod jong ka State Finances Audit Report jong ka Comptroller and Auditor General of India ba dei jong ka kut snem Lber 31, 2022.
La kdew ruh ba ki tnad kiba kham heh kiba khlem pat phah ïa ki UC bad ka jingsah ka pisa na kaei kaba la mang hapoh ka thup Grant-in-Aid, ki kynthup ïa ka Community and Rural Development da ki 1137.40 klur ne 47.92%, Planning Department da ki 457.58 klur ne 19.28%, Health and Family Welfare Department da ki 272.22 klur tyngka ne 11.47% persen, Social Welfare department da ki 198.99 klur tyngka ne 8.38%, Education and Human Resource Development da ki 171.78 klur ne 7.24% bad ka Border Areas Development department da ki 37.36 klur tyngka ne 1.57% persen.
Shuh shuh la ong ruh ban pyni ba ïa kitei ki song jingïarap la dep ban pyntreikam pura lah ban pyntikna hadien ba la ïoh pdiang ïa kai UC kiban ïada na ka jingbakla lynti jong ka song jingïarap na bynta kiwei pat ki kam.
La kdew ruh ba ka jingbym pat ïoh ïa ki UC, lah ban ong ba ka jingpynlut kaba kdew ha ka jinglum jingkhein, lah ban ong ba kan dei kaba khatduh lane lah ruh ban pyntikna ba ïa kitei ki song pisa la pyntreikam shisha na ka bynta ka kam.
Ka jingbym phah ïa ki UC la ong ba ka kdew ruh ba ki bor ba dei peit kim shym la pynshai kumno la pynlut ïa ka pisa ha kine ki snem. La ong ruh ba kam don kano kano ka jingpynshisha ba ka jingthmu ba ai ïa kitei ki song pisa la dep ban pynurlong. Nalorkata, ka kaiphod ka ong ruh ba ka jingbym don ka UC, ka pyni ruh ba ym pat lah ban pyntikna ba la ki nongïoh ïa kitei ki jingmyntoi ki la pyndonkam hok shisha neem ïa kitei ki song jingïarap kumba la mang.
La ong ruh ba lah ruh ban long ba ïa kitei ki song pisa ba la ïoh ym shym la pynlut bad la shu sahkut ha ki bank account jong ki tnad bapher bapher.
Kumta halor kane, la kyntu ïa ka sorkar jylla ba kan peitngor halor kane ka kam bad ba kan peit ba ym tang ba kito kiba donkti ban phah ïa ki UC ha ka por kaba biang sha ka Finance Department bad ruh ka PAG(A&E) hynrei ban buddien ruh halor ka jingphah ïa ki song pisa sha ki tnad.
