Shillong, ïaïong, 02: Kumba long lem kiwei ki nongïalehkai sports ba tbit ha ka jylla u Bah Trishan Malngiang, 29 snem ka rta u la ngat ha ka jingshitom jur ha ka 24 tarik, Nohprah, 2022, hadien ka jingmynsaw katba u dang ïalehkai phutbol ha madan Polo.
Na kane ka jingmynsaw, u Bah Malngiang uba trei ha ka ophis u Director General of Police (DGP), Meghalaya, u la ïakynduh jingeh haduh katta katta ban ïaid ban ieng bad pynlong ïa u ban leit sha ki nongsumar khem pynban ka jingshitom jong u ka la nang jur. Wat hapdeng ka jingïaleh ban ïoh ïa ka jingsumar ha la ka jong ka jylla pynbna u bapli um kotbor satia ban leit wad jingsumar ha ki Hospital shimet namarba ka jingpuid kan lut la kumno kumno haduh 4 lak tyngka.
Hynrei hapdeng ka jingdukha mynsiem, u Bah Malngiang u la ïoh mynsiem haba ki don katto katne ngut ki paralok jong u kiba la koit na kajuh ka rukom kheiñ shyieng, ki la ai jingmut ïa u ban leit shah sumar ha Orthopaedics Department jong ka Shillong Civil Hospital kaba baroh shikatta ka la ai jingsumar jar jar ïa ki paidbah bd bun kiba la ïoh jingkoit. Ha kaba kut jong u bnai Kyllalyngkot, mynta u snem, u Bah Malngiang u la leit ban ïa kynduh ïa u Orthopaedic Surgeon u Dr. Wanlam Khongwir uba la pynlong shwa ïa ka jingtohkit bad khatduh ïawai u la ïathuh ba yn donkam ban puid namarba ka jingkdiah ka shyieng ha ka kjat ka diang ka la kham jur bad kaba lah ban buh jingma ïa u nongpang hadien habud.
Mar mar, u Dr. Khongwir u la wad ïa ki tiar jingsumar na Mumbai namarba ym don tiar satia ha North East bad namarba kane ka jingpuid kim da kham jia eh ha ki jylla jong ka thaiñ Shatei Lammihngi.
Tang shu poi ki tiar, ïa u Bah Malngiang la phah wan sumar ha Hospital ha ka 18 tarik Lber,, 2023 bad hadien ba la pynkilan met (Physiotherapy) ban kham ïoh bor shwa ban puid noh, ha ka 21 tarik, Lber 2023, ka kynhun jong ki doktor sumar shyieng kiba kynthup ïa u Dr. Wanlamkupar Khongwir bad u Dr. N. P. Laloo lem bad u Anaesthetists u Dr. H Majaw bad u Dr. M Surong ki la sdang ïa kane ka jingpuid kaba nyngkong eh ïa kaba la tip kum ka kind Arthroscopic Posterior Cruciate Ligament (PCL).
Lah ban kdew hangne ba kane ka jingpuid ka dei kaba nyngkong eh ha Meghalaya ban leh ha ki jaka ai jingsumar jong ka Sorkar da ki doktor sorkar bad da ka jingjop ka Shillong Civil Hospital ka la paw kum kawei na ki shlem sumar kaba lah ban pynkoit ïa ki briew kiba kdiah shyieng.
U Bah Malngiang uba dang don hapdeng ka jingshah sumra, u la ong ba u dang angnud ban ïoh ïalehkai biang sha madan phutbol hynrei da ka jingphikir. “Nga sngewnguh ïa ki doktor kiba la sumar ïa nga bad kiba sngewthuh ruh ïa ka jingshitom bad kiba la ïatreilang bad kumjuh ruh ki Nurse,” ong u Bah Malngiang.
“Nga la duh mynsiem namarba ngam don pisa ban leit shah sumar ha ki private hospital, hynrei hangne ka jinglut jingsep ha ka jingsumar ka long beit thik tang kat kaba nga kot bor. Kane ka dei ka khubor kaba bha na ka bynta ki nongïalehkai sports ha ka jylla. Nga sngewnguh shikatdei eh ïa ka Shillong Civil Hospital,” u la bynrap.
U Dr. Khongwir u la ong ba kane kan long ka khubor kaba bha na ka bynta ki nongïalehkai sports ha Meghalaya lada ki ngat ha kano kano ka jingmynsaw ha kano kano ka khyllipmat bad kiba la poi ha ka kut lad.
Katkum ka jingïathuh jong u Dr. Khongwir, ha ki lai snem baladep ki don bun tylli ki jingpuid ïa kiba kheiñ shyieng bad ki long kiba jop ha Civil Hospital Shillong hynrei kane ka dei ka sien banyngkong eh ban puid ha ka sien banyngkong eh.
Haba ïaroh ïa ka kynhun ki doktor, ki surgeon, ki para medical staff, ki senior most Surgeon, u Dr. N. P. Laloo u la pynpaw ka jingkmen ba ka Orthopaedic Department jong ka Hospital ka la ïaid shakhmat. Ka jingdon jong kane ka shnat ai jingsumar kan ïarap haduh katta ïa ki longïing kiba wan na ki longing kiba duk.
U la ïathuh ba ka Department mynta ka la phaikhmat sha ki tymmen kiba la noh ka rta kiba pang shyieng bad kiba donkam ïa ki jingsumar kiba katkum ka jingïaid jong ka por. “Ha kaba ïadei bad kane, ki jingsumar kum ïa kiba pang syngkai, khohsiew, bad ban bujli ïa ka ksang kti la leh bunsien ha Civil Hospital Shillong. Bun na ki nongpang ba la san ka rta ki la ïoh jingmyntoi bad ki la ïoh jingkoit,” u la ïathuh.
“Ngi la sdang ruh ba puid ïa kiba pang budlum bad ngi kyrmen ba ha ki snem ban sa wan da ka jingkyrshan jong ka tnat ka Koit ka Khiah bad ka sorkar ka jingangnud jong ngi kan sa long kaba jop,” ong shuh shuh Dr. Laloo.
Haba pynpaw ïa kane kajuh ka jingsngew, u Surgeon Superintendent jong ka Shillong Civil Hospital u Dr. Andrias Dkhar u la ong,“ngi la pyrshang ban leh ïa kaba bha tam bad ki don ki khep kiba khanglad ruh ïa ngi, na ka daw ka jingbym don jaka bad ka jingbym biang ka um bad ka bording.”
U Principal Secretary jong ka tnat ka Koit ka Khiah ka Sorkar Jylla u Sampath Kumar u la ong, “ ka sorkar hapoh ka jingïalam jong u Myntri Rangbah bad u Myntri ka Koit ka Khiah ki la buh thong ban kynjoh sha ka jingjop bad nga kwah ba ïathuh ha phi, ha ki lai snem ban sa wan, ki jingkylla kin sa urlong. Kumba la pynpaw ha ka mang tyngka, ngin sa nang pynkiew shuh shuh ïa ka jingdon jong ki doktor, ki stad ai jingsumar, ki para medical staff, ki tiar ai jingsumar bad kiwei kiwei khnang ba ka jingshakri kan pynhun mynsiem ïa ki paidbah,” la bynrap u Kumar.
