Pakhang lynti ki Pulit ïa ki dkhot HNYM ba thmu hiar khynra trok kit mawshun sha Majai

Shillong, Naiwieng, 21: Ki dkhot jong ka Hynñiewtrep National Youth Movement (HNYM) kiba thmu ban hiar sha ka shnong Majai ha ka sngi Baar ki la shah pakhang lynti ha ki Pulit jong ka Sohra Police Station bad ha ki Magistrate jong ka Sohra Civil Sub-division ha Umstew, ka jaka kaba don hapdeng ka shnong Laitryngew shwa ban poi sha Sohra.
Ha ka jingïakren bad u nonglum khubor, u Vice President jong ka Seng u Bah Marshall Nonglait u la ïathuh ba kane ka jingthmu jong ka Seng ban hiar sha ka shnong Majai ka long hadien ba ka la don ka jingkynnoh ba ki mynder na ka ri Bangladesh ki la pynkheiñ ïa ka hukum jong ka Ingbishar Meghalaya High Court kaba mana ïa ki trok ban kit palat 12 ton shaneng hynrei, katkum ka jingtip ba ka seng ka la ïoh pdiang, la ïathuh ba ki bor synshar district kim shym la leh eiei watla ki trok kit mawshun jong ki mynder na ka ri Bangladesh ki kit ïa u mawshun 20-24 ton kaba pynlong ïa ka Sorkar ban duhei ïa ka jingïoh lum khajna.
“Da ka jingtuklar jong ki Magistrate, na ka liang jong u Commissioner and Secretary ka tnat Transports u la kyrpad ïa ngi ban ïakren hapoh ka ophis treikam jong u halor kane ka kam shwa ba ka seng kan shim ïa kano kano ka rai,” la ong u Bah Nonglait.
“Kumba ka long ka jingïakren ka dang ïaid bad lada u Commissioner and Secretary jong ka tnat Transports u lah ban pynbha ka la bha syndon bad lada um lah ban pynbha bad lada ngi ïoh ïa ka jingtip ba ka jingïakren kam long ngin tur beit shathie (sha Majai) ka mat jia eiei ngin ym khuslai ïa kata,” la byrngem u Bah Nonglait.
Haba ïathuh bniah ïa kane ka jingthmu jong ka seng ban hiar sha Majai, u Bah Nonglait u la ong, “shibun tylli ki shithi ngi ladep aiti sha ki tnat treikam bapher bapher ha kaba ïadei bad ka Majai namarba bun ki kam be-aiñ kiba don ha Majai. Katkum ka hukum ba la pynmih da ka Iingbishar Meghalaya High Court la shah ban kit tang 12 ton u maw shun. Hynrei ha Majai ki kit palat 22, 23,24 ton.”
“Ka seng ka ladep mudui da ka ejahar ha u bnai Jymmang 2023. Ka jingkit palat pud ka long ka jingduhnong ïa ka jylla. Ka Sorkar ka duh ïa ka khajna. Na ka liang ka seng ngin ym shongthait namarba ka ejahar ba ngi la ujor kam shym la treikam satia bad ki trok ki ïaid beit kumba ju long manla ka sngi,” la ong u Bah Marshall.
U la kynnoh ruh ba ha ka shnong Majai, ka shnong kaba don markhap bad ka ri Bangladesh, ki kot ki sla jong ki trok kit maw jong ki bar jylla ki long ki bym biang satia bad kynnoh ruh ba ka jingleh Benami ruh ka long kaba shyrkhei bha hapdeng ki mynder ri na ka ri Bangladesh bad ki Khasi kiba sah ha ka shnong Majai.
“Manla ka thliew iing ki don beit ïa ki Sticker. U mynder ri (na Bangladesh) u thied ha ka dor T. 8 -10 hajar kawei ka Sticker ban ïoh mar. U briew (trai jylla) ïoh beit thik tang ka bai Sticker kaba T.8-10 hajar katba ka kamai kajih ka dei beit na ka bynta ki nongkhaii maw na Bangladesh,” la kynnoh u Bah Nonglait.
“Kane kaei kaei kaba pynsngewkhia ïa ka seng namarba ka pynduhnong ïa ka khajna jong ka jylla. Sa bun ki kam be-aiñ ban pynriewspah ïa ki poiei bar-ri,” u la ong.
Na ka liang jong u Magistrate ka Sohra Civil Sub-division u Bah R. Kharbihkhiew u la ong ba ka jingbat ïa ki dkhot ka HNYM ha Umstew ka long ban khanglad ïoh ka mih kano kano ka jingjia ba sngewsih lada ailad ba kin hiar sha ka shnong Majai.