Shillong, Naiwieng 21 : Ka Myntri ba dei peit ïa ka tnad ka koit ka khiah bad MLA ka NPP na ka East Shillong Constituency ka kong Ampareen Lyngdoh ka la ong ba ka kloi ban ïakhun ïa ka election MP lada ka party ka ibit bad jied ïa ka ban long kum ka kyrtong na kane ka Shillong Parliamentary Constituency ha ka election MP Lok Sabha ban long ha u snem ban wan.
“ Nga dei ka nongmihkhmat jongki paidbah kumta lada ka party ka ibit ban pyniakhun ïa nga ban mih khmat ïa ki paidbah jongka jylla nga kloi ban leh ïa kata” ong ka kong Ampareen.
Ka la ïathuh ba ka party shen kan sa shim rai halor kane ka kam “ Nga dei ka dkhot bad nongtrei ba shitrhem jongka party. Nga dei ka nongmihkhmat bad nongïalam ki paidbah lada phah ïa nga ban ïakhun ha kano kano ka bynta ruh nga long kaba la kloi” ong biang ka kong Ampareen.
Haba jubab halor ki jingkylli ka kong Ampareen ka la ong “ ki jingïaleh ki wan bad ki leit bad ym don uwei ruh u ba lah ban ong ba ka la long palat ïa nga kiei kiei kiba wan phi hap ban jied bad rai bad ha kane ka kynti ruh ïoh lehse ka por ka la dei namar ka histori ka ju phai dien beit. Nga long kaba kloi ban shim ïa kano kano ka bynta bad ngam ju kynran dien satia namar nga pdiang beit ïa ki kumba ki long bad wan jia”.
“ Ngan shim ïa ka bynta kat kum ka jinglah jong nga bad ïa kane ka bynta ruh kam dei kaba ym lah. Nga la long ka riewshem phang bha ha ka sain pyrthei bad nga don ruh ka kyrdan kaba la bit la biang hi. Kane ka shu long tang kawei pat ka election. Hynrei wat la katta ruh ngi ïeh beit ha ka jingstad jong ki nongjied namar ki dei ma ki ki ban rai hynrei na ka liang jong nga hi ngam don jingsheptieng ne kynran dien lada ka party ka ibit ïa nga. Hooid kam long kaba suk namar ym don hi ruh ba nud ban ong ba ka long kaba suk” ong biang ka kong Ampareen.
I la bteng biang da kaba ong “ Ngan leh ïa kaei kaei kaba donkam bad kaba kongsan eh ka dei ka team jong nga. Ngam lah ban leit sha ka election lada ka team jong nga kam pat long kaba la pynkhreh bad kata ka dei ka NPP keiñ. Ki don haduh 36 tylli ki constituency na ka bynta ka Shillong Parliamanetary Constituency. Kumta ki dei kine ki 36 tylli ki ban ïeng bad kyrshan ïa nga ryngkat bad ka jingtrei ba shitrhem jong ki nongïalam ka party”.
