Ñiew shilliang khmat ka sorkar ïa ki nongkyndong bitar ka Synjuk ki Sordar 10 shnong

Nongstoiñ, Naitung 19: Ka Synjuk ki sordar jong ki shiphew tylli ki shnong ka Mawthungmarwei, Ramsngiwar, Phodumbah, Ranabbah Domkohmen, Phodumbah Sepngi, Mawkohïew bad kiwei kiwei kiba don harud ka surok Rambrai-Mawlangsu, mynta ka sngi ki la lum ïa ka jingïalang paitbah ha Phodumbah Upper Primary skul ban ïatai sani bad ïaphylliew jingmut, ha kaba ïadei bad ka jingbym leh ei ei jong ka sorkar ïa ka surok na MawthungMarwei shaduh Mawlangsu kaba jrong tang kumba khatwei kilomitar bad kaba la shna surok naduh u snem 1994.
Ha katei ka sngi ba la pynïaid ïa ka jingïalang da u bah Kharlesborn Nongbri president ka Synjuk, la wan ban ïa shimbynta lang da baroh ki sordar shnong, ki longkmie, ki samla, ki Village Organisation, ki Sengkynthei, VDP haduh ki riew tymmen.
Haba ai jingkren u bah Khralesborn Nongbri u la pynpaw ïa ka jingsngewkhia, namar haman ki por elekshon ki kyrtong kiba wan pan jingkyrshan na ki paitbah katei ka thaiñ, ki ju kular ba kin shimkhia ban pynbha ïa katei ka surok. Hynrei haduh mynta kim shym la pyndep ïa ka jingkular ka jong ki. U la ong ruh ba ka jingkhot ïa katei ka jingïalang ka long ban pynshai sha ki paitbah ba ka por ka la dei ba ka sorkar kan leh ei ei, khnang ba ki paitbah kin lait na ki jingeh.
U babu Ignatius Khardewsaw u la ong ba ha ka 19 tarik jong u bnai Jylliew ba la dep, ki nongïalam ka synjuk ki la leit ban ïakynduh ïa u bah Prestone Tynsong Symbud Myntri Rangbah ka jylla ha kamra trei kam jong u, ha kaba ki la aiti ruh ha u ïa ka Detail Project Report kaba la shna da ka ophis jong u Executive Engineer ka tnad PWD Western Circle.
Katkum katei DPR la kdew shai ba ka jinglut jingsep ha kaba pynbha bad siang rong ïa katei ka surok kaba 11 kilomitar, ka long arphew wei klur tyngka tam. Na ka liang u Symbud Myntri rangbah u la kular ba ka sorkar kan sa shimkhia bad kans a khot tender noh kham kloi hynrei haduh mynta kam pat leh ei ei.
Hadien ba la wai ka jingïalang, na ka liang ki longkmie kiba dei ki nongïalam jong ki VO na ki shiphew tylli ki shnong haba ïa kren bad u nongthoh khubor, ki la ong ba kumba ki nongïalam ka Synjuk ki la pynshai ha ki lada ka sorkar kam leh ei ei ne khot tender shuwa ka Elekshon MDC, na ka liang ki longkmie bad ki paitbah jong ka thaiñ kin sa pynlong biang ïa ka jingïakynduh lang, ban shim da ki rai kiba kham tyngeh bad lada ka sorkar kam sngap kim banse ban ïaid da kiwei pat ki lynti.
Kitei ki longkmie ki la ong ruh ba kum ki riew kynthei, ki shem shitom haduh katta katta ha ka leit ka wan na ka jingbym don ka surok kaba biang. Namar lada ki pang ki shitom ki hap ban leit phah sumar sha Rambrai PHC bad ki longkmie ba armet lei lei, haba ki donkam ban leit phah check ha ki doctor ha Rambrai PHC, ki hap ban ïaid da ka kjat haduh lai kynta tam kumta ka buh ha ka jingeh kaba khraw.
Na ka liang ki nongïalam ka synjuuk pat ki la ong ba ha ka taïew ban wan, kin sa leit ban ïakynduh biang ïa u Executive Engineer bad u Superintendent Engineer ka tnad PWD Western circle, ban pan jingshai ba balei haduh mynta ym pat khot tender ïa katei ka surok.
Lada kitei ki ar ngut ki heh ka PWD kim lah ban pynhun ïa ka jingkwah jong ki paitbah, kin sa leit kiew biang sha Shillong sa shiwat ban ïakynduh ïa u Symbud Myntri Rangbah, ban dawa ba u dei ban pynsngew biang sha ka sorkar ba kan pynbit pynbiang noh ïa katei ka surok. Lym kumta kin pyni da ki kam la ka dei ban pynlong da ki jingïakhih paitbah ne kin ïaid da kiwei pat ki lynti kiba kham tyngeh.