ñiah khlem akor, khlem pyllait ïa Ambulance bad jan tynrah ïa kiwei ki kali ha sor Nongpoh : SSP Ri-Bhoi

Nongpoh, Nohprah 14: Hadien bala saphriang kawei ka jingthoh bad jingkynnoh bala mih ha kawei ka sla Facebook kaba la ai kyrteng ‘Senapati Today’ bala kynnoh ruh ïaka jingleh ba heh jong u Senior Superintendent of Police ka Ri-Bhoi u VS Rathore ïa ar tylli ki kali ha sor Nongpoh katba ki dang thmu ban hiar sha Guwahati, u VS Rathore u la pynshai ba kane baroh ka dei tang ka jingkynnoh kaba khlem nongrim hadien ba kitei ki nongñiah kila ñiah khlem akor ïa kitei ki kali hapdeng sor Nongpoh kaba dei ka jaka ba bun ki paidbah bad khlem ailad ruh ïaka ambulance bad pynpah horn lynter.
Katkum ka jingkynnoh lyngba katei ka sla Facebook la ong ba kane ka jingjia kala jia haka nohphaisngi jong ka 11 tarik Nohprah haka ba u SSP ka Ri-Bhoi u la ïaid ryngkat bad 2 tylli ki kali kiba synran ïa u nadien bad nakhmat bad ha kum katei ka por 2 tylli ki kali kila shim pass ïa u, hynrei u SSP u la phah bat ïaki haduh kumba 3 kynta ha Nongpoh PS, katei ka kali kaba shim pass ha khmat la shong ruh da shijur ryngkat bad uwei u khynnah rit, kiba dang thmu ban leit sha kad liengsuiñ ha Guwahati katba katei ka kali kaba shim pass nadien ka dei ka kali Thar kaba shong ruh 3 ngut ki briew ha kaba la kynnoh ruh ba kila shah bat haduh lai kynta khlem kano kano ka kuna, bad khlem pynpaw ruh ïaka daw ba ki pynkheiñ aiñ ne pynsted palat ïaka kali.
Shuh shuh la kynnoh ruh ba kitei ki shijur kiba ïaid nakhmat kila duh ruh ïaka liengsuiñ jong ki, namar ka jingpynthud bad jingsarong jong ki pulit bad pynpaw ba katei ka jingleh ki pulit ka long ba ki hap ban ïaid ha ka jingsted kaba kham duna ban ïa kaba ju ïaid ha surok bah 4-lane, bad ym kum utei u pulit IPS, namar kitei ki 2 tylli ki kali ba shim pass ki ïaid ban poi sha ka jaka ba ki thmu haka por ba biang.
Lyngba katei ka Facebook Page la kynnoh ba ka jingleh utei u SSP Ri-Bhoi, ka pyni ïaka jingleh baheh bad kaba wanrah ruh ka jingjah burom ïaka tnad pulit ha kaba la kyrpad ruh ïa u Myntri Kam Pohiing ka jylla bad ka DGP ba kidei ban shimkhia ïa kane ka jingleh une u pulit ophisar.
Ha kaba ïadei bad kane ka jingkynnoh naka liang u VS Rathore Senior Superintendent of Police ka Ri-Bhoi u la pyntip ki nongñiah jong kitei ki 2 tylli ki kali ñiah khlem akor ha kaba kila jan tynrah ruh ïa kiwei ki kali haka jaka paidbah ha sor Nongpoh, ki khlem pynlait ruh ïaka Ambulance bad pynpah horn lynter, namarkata la pynsangeh ïaka kali jong ki bad rah ruh sha thanad Nongpoh naka bynta ban pynlong ka jingtohkit bad hadien la daiñ kuna ruh ïaki.
U la pyntip ruh ba utei u briew ba shong ha katei ka kali Thar u leh baheh bad pyni jinglong ïaki pulit pynïaid kali ha kaba u SSP u la sakhi ruh dala ki jong ki khmat bad bthah ïa ki pulit pynïaid kali ba ki rah sha thanad ban leh ïa kaba donkam, namar kum kine ki jingjia ki shait jia man ka por, haka por ba ki pulit ki ju talasi kali bad kam don kano kano ka jingpher ha kaba u la ong ruh ba lehse utei u briew um sngewtynnad ban shah talasi haki pulit bad kynnoh pynban da kumtei.