Ngin ym weng ïa ka pakhang surok tat haduh ban da maramot ïa ka surok : JAC Dong Namchiang Narpuh

Khliehriat, Jylliew, 19: Ka jingkhot pakhang surok ba khlem pud sngi da ka JAC Dong Namchiang ha Narpuh, East Jaiñtia Hills District ka la sdang naduh ka step sngi Balang ha ka por 7:30 baje mynstep bad la sakhi ïa ki paidbah nongshong shnong na Tongseng, Kuliang, Pyrtakuna, Umkiang, Donaskur, Donaumbluh, Ratacherra, Malidor ki la mih ha surok bad khanglad ïa baroh ki kali kiba pyrshang ban ïaid lyngba ka surok National Highway-6.
Ki Waheh Shnong, kumjuh ruh ki dkhot kiba don ha ka shatri jong ka JAC bad ki paidbah ki la pynpaw ka jingsngewkhia halor ka jingleh mynthi jong ka National Highway Authority of India (NHAI) bad ka Sorkar Jylla ha kaba ïadei bad ka jingsniew jong ka surok bad ki la ong ruh ba kin ïai bteng beit ïa kane ka jingpakhang surok ba khlem pud sngi tat haduh ba ka Sorkar bad ka NHAI kin da shna bad maramot bha ïa ka surok.
“Ngi la ngiah ban sngap ïa ki jingkular kai na ka liang ki bor synshar ka East Jaiñtia Hills District bad ka NHAI kiba shu kut tang ha ka ktien bad kular kai da kaba ki ju ong ba kin shna noh ïa ka surok,” la ong ki paidbah.
La sngewthuh ba ha kane ka kynti, ki paidbah ka thaiñ ki la rai rangbah ba kin ym weng da leilei ruh ïa ka pakhang surok lada ka NHAI kam maramot bha ïa ka surok namarba ki la sngewsohsat shaba palat ha ka leit ka wan.
U Chairman jong ka JAC, u Bah Lasting Pala, u la ong, “ka JAC ka kyntait ban ïakren bad ka Sorkar bad ka NHAI, namar baroh ki kut tang ha ka jingïakren. Ka surok ka ladap sa tang da ki thliew ki syar kiba la long kum ki krem kata naduh Tongseng ter ter shaduh Malidor. Ma ngi ki nongïalam bad ki paidbah ngin ym kynriah bad wat lada ka dei ïa ngi ban shong da ki bnai ruh kam pher katba ka Sorkar bad ka NHAI kam pyndep ïa ka kamram namarba ha ki por ba la leit ki ladep ai ka jingkular hynrei kam shym la don ka jingsei soh. Kane kam dei kata ka kam kaba kin shu wan ïalehkai politik hynrei kane ka dei ka kam ïap kam im jong ki paidbah.”
“Kumba long mynta ki paidbah na ka jylla Assam ruh ki jynjar lang bad tang kawei ngan ong ba ka Sorkar ka dei ban phah maramot kloi ïa kane ka surok bad lada ym lah ban maramot ngin ym treh ban weng ïa kane ka jingpakhang surok bad ynda la dep ban maramot ki bor synshar district, ka NHAI kim donkam ban wan kynduh ïa ngi hynrei ngi da lade hi ngin weng ïa kane ka pakhang surok,” u la ong.
“Ngi la thait ban ïakren bad ki bor Sorkar, namarba ha ki por ba la leit ruh ngi la dep ïakren bad dep ruh ban ai ka jingkular hynrei ki shu kut tang ha ki jingkular. Na kata ka daw ka la pynlong ïa ki paidbah na ka dong Namchiang ban mih madan bad ngi ruh kum ki nongïalam shnong ngim hun ban shu peit ïa ki jingeh jong ki paidbah lada long katba long ruh lada hap shah ha u slap bah bad lada wan sa ka eriong ruh ngin shong beit hangne ha surok haduh ban da maramot bha ïa ka surok,” ong u Bah L.Pala.
Ha kane ka sngi u Block Development Officer (BDO) jong ka Lumshnong C&RD Block Bah L.Kharmon u la hiar sha Ratacherra bad ïakynduh ïa ki nongïalam jong ka JAC bad u la kubur ruh ba ka surok ka la sniew shaba palat bad ong ruh ba na ka liang jong ka NHAI ka la sdang ïa ka jingmaramot ha kane hi ka sngi, hynrei watla katta ruh na ka liang ki nongïalam ka JAC bad ki paidbah ki la pyneh bad ong ba kin ym lah ban weng da leilei ruh ïa kane ka pakhang surok tat haduh ban da dep ka jingmaramot ïa ka surok.
U Chairman JAC Bah Lasting Pala, u Secretary ka JAC Bah Love You Bareh, u MDC barim uba dei ruh u Waheh shnong barim ka Ratacherrra Bah D.Pohshna, u Waheh Shong ka Ratacherra Bah Pynkhlaiñbor Dhar, ki la kren hakhmat u BDO ba kin ym weng ïa ka jingpakhang surok tat haduh ba ka NHAI kan da maramot bha ïa ka surok.
“Ki bor synshar shnong na ka thaiñ Namchiang ngi ju long kiba kloi ban ïa treilang bad ka Sorkar ha kano kano ka bynta, hynrei namarba ngi la shah shet nalor ba ngi la kohnguh hynrei na ka liang jong ki pat kim pyndep katkum ba la kular. Kane ka pynsngewsih shikatdei eh ïa ngi. Kumta ka rai kaba mih na kiba bun balang ban pynlong noh da kane ka jingaphang surok bad ngin ym weng shuh haduh ban da dep ïa ka surok namar lada ngi dang weng ngi tip ba kan jia kumjuh hi kumba mynshwa bad kan shu kut tang ha ka jingkular kai khlem poi shano shano ruh,” ong u Bah D.Pohshna.
U Waheh Shnong ka Ratacherra Bah Pynkhlaiñbor Dhar bad u waheh Shnong barim ka shnong Pyrtakuna Bah William Shylla, ki nongïalam ka JNC, HYC-Narpuh Circle bad ki nongïalam ka VPP Narpuh Circle bad ka seng ki nongniah trok ki la pynpaw ka jingsngewkhia namar ka jingleh mynthi ka Sorkar bad ka NHAI ha kaba ïadei bad ka jinglong jingman ka surok ha ka thaiñ kaba la buh jingeh bad buh jingma haduh katta katta ïa ki paidbah ba leit ba wan.
Ki la ong ba na ka por sha ka por ki la pynsngew sha ka Sorkar ha kaba ïadei bad ka jingkynduh jingeh jong ki ha ka leit ka wan hynrei na ka liang ka Sorkar ka leh bym salia.
U Bah Pynkhlainbor u la ong ba don ka por ba ki longkmie ba armet ki ju kynduh jingeh bad kiba pang ba shitom ruh namar ban leit sha Khliehriat, sha Jowai bad sha Assam ruh ki hap ban ïaid lyngba na ka surok kaba jot ba pra. Kum ki nongsynshar shnong lem bad ki paidbah kin kyrshan beit ïa ka rai jong ka JAC ban bteng beit ïa kane ka jingpakhang surok kaba khlem buh por tat haduh ba ka NHAI kan sa shna bha ïa ka surok kam pher watla ka dei ïa ki ban shong ha surok wat shi taïew ne shi bnai ruh tangba dei beit ban ïoh ïa ka surok kaba bha.
U Waheh Shong barim jong ka Pyrtakuna Bah William Shylla u la ong ba lada ka Sorkar kan sngap bad kam shim khia ïa kane ka kam ban pynbha ïa kane ka surok, ka jingpakhang surok kan dang ïai bteng beit kumba la rai da ka JAC.
Ha kane ka jingïakhih ba la pynlong da ka JAC, la ai jingkyrshan lang da ki nongïalam bad ki dkhot ka Jaiñtia National Council ba la lamkhmat da u Art & Culture Secretary Bah Mehi Rymbai, ka Hynñiewtrep Youth Council Narpuh Circle ba la lam khmat da u Bah P.Pale, ka Voice of the People Narpuh Circle ba lam khmat da ka President Kong Deiwi Tongper bad ka East Jaiñtia Hills Truck Owners and Transporters Association.