Shillong, Nailar, 12: Ka Sur Ka Bri U Hynñiewtrep (SKBUH) sa shisien ka la mih biang shakhmat ban ai jingkyrshan bad ai mynsiem ïa ka ïing ka sem kaba dang ïakhun haduh mynta mynne ban pynïoh ïa ka jingbishar ba hok ïa ka jingshah siat ïap u Bah Cherishterfield Thangkhiew u General Secretary barim ka HNLC ha ki pulit ha ka ïing sah ha Mawlai Kynton Massar.
Na ka liang kane ka kynhun ha ka janmiet jong ka sngi Saitjaiñ ka 12 tarik Nailar 2023 kata shi sngi shuwa ka jingdap ar snem ka jingjia shah siat ïap ïa u Bah Cherishterfield ha u 2021, ka la leit ban ïakynduh ïa kiba haïing hasem ban ïakren bad nang ai shuh shuh ka jingkyrshan halor ka jingïakhun ba khlem sangeh jong ki na ka bynta ka hok.
U Bah Thomas Passah Secretary ka Sur ka Bri U Hynñiewtrep haba ïakren bad u Mawphor, u la ong kumba ka kynhun naduh kaba sdang ka la kular hakhmat u paidbah bad ka ïing ka sem ban ym sangeh hynrei ban ïai ïaleh tad haduh ban da ïoh ka jingbishar kaba hok, ka la wan ban ai mynsiem bad kyrshan ïa ki. U la ïathuh ba na ka liang ka kynhun na ka por sha ka por ka ju leit ban tied jingkhang na ki tnad sorkar bapher bapher bad ïakynduh ruh ïa ka tnad pulit lyngba ki SP ban wad jingtip halor ki sienjam ba ka sorkar ka la shim hadien ba la mih ka kaiphod na ka inquiry Commission, hynrei haduh mynta kane ka kam ka dang sah ha ka umdum.
U la ïathuh ba ka sorkar ka la pyrshang ban pynsngap jar noh ïa ka ïing ka sem da kaba tyrwa da ki kam sorkar bad ruh da ka pisa, hynrei kum ka kynhun ka dap da ka jingsngewkmen ba na ka liang ka ïing ka sem ka la kyntait bad ïaid beit shakhmat ban ïakhun ïa kane ka kam haduh ka ïing bishar ba don burom ka Meghalaya High Court.
U la ïathuh ba na ka liang ka ïing ka sem lashai ka sngi ka 13 tarik Nailar 2023 kan sa kynmaw burom ïa u Bah Cherishterfield Thangkhiew da kaba leit buh syntiew ha u lum jingtep ha kaba na ka liang ka kynhun ruh kan ïadonlang ha katei ka jingleit buh syntiew.
Kum ban pynkynmaw hangne, u Bah Cherishterfield Thangkhiew general secretary barim ka seng HNLC u la shah siat ïap ha ki pulit ha ka step jong ka 13 tarik Nailar 2021 ha la ka jong ka ïing sah ha Mawlai Kynton Massar bad la tep don burom ha ka 15 tarik Nailar kaba dei ruh ka sngi laitluid jong ka ri India ne ka Independence Day.
