Ngin ym ailad ïa ka SMB ban kyndang ïa kiba shongdie madan, ong ka nongïalam ka TUR

Shillong, Jylliew 30: Ki nongdie dukan madan ha ka sngi Nyngkong ki la kyntait ban mih na ka thaiñ Khyndailad kum ka dak ban pyrshah jur ïa ka jingkyndang jong ka Shillong Municipal Board (SMB).
Katkum ka jingong ka Meghalaya and Greater Shillong Progressive Hawkers and Street Vendors Association (MGSPHSVA), ki nongshong dukan bad ki nongdie madan kin kynriah tang lada la pynbeit shwa ïa ki jingduna bad ki jingbakla da ka Provisional Town Vending Committee (PTVC).
Lah ban ong ba kane ka jingkyndang kadei kaba la leh hakhmat ka jingdon ki magistrate bad ki pulit, ka long ruh hadien ba ka sorkar jylla ka la pynmih ïa ka jingpynbna ha ka 21 tarik u Jylliew ba ka bynta ba shapoh ne Ground Floor jong ka Meghalaya Urban Development Authority (MUDA) kum ka ‘Vending Zone’ ne ka jaka ban shong die jingdie bad ki bynta ba sah jong ka thaiñ Khyndailad kan dei ka ‘No Vending Zone’ ne ka jaka kaba ym shah ban shong die jingdie madan.
Haba wanmih lang ha kane ka jingshah kyndang kiba die madan ka nongïalam ka Thma U Rangli Juki ka Kong Angela Rangad, kaba ju ïadonlang bad ka MGSPHSVA, ka la kynthoh tyngeh ïa ka SMB kaba pyrshang ban pynthud ïa ka shongsuk shongshngaiñ da kaba pyrshang ban kyndang jubor ïa ki nongshong bad ki nongdie jingdie ha madan.
Haba kren bad ki lad pathai khubor ka la ong, “Ngin ngin ym ailad ïa ka SMB ba kan kyndang ïa ki nongshong die madan. Ngi ngin kynriah tang hadien ba ngi lah ïoh ïa ka Plan ne ka jingpynkhreh.”
Na ka liang ka Kong Angela Rangad ka la ong ba ka MGSPHSVA ka la ïai dawa naduh u bnai Kyllalyngkot na ka SMB ban pynsangeh ïa ki kam ki jam hynrei ka la ïaid shakhmat ban shna ïa ka jaka ha khrum jong ka MUDA khlem ka jingïoh jingmynjur na ka PTVC. Ka la kynnoh ruh ba katei ka jaka kaba la ithuh ha MUDA kam long kaba bit kaba biang ban die shong die jingdie bad kam long ruh kaba shngaiñ na ka bynta ki nongdie jingdie bad ki nongwan thied jingthied.
Ka la ong, “Ka SMB kadei ban wanrah ïa katei ka Plan ne jingpynkhreh hakhmat jong ka PTVC. Kane kadei namar ba ngi dei ki dkhot kiba la shah pynkup bor jong ka bad ngi dei ma ngi ki ban rai kumno ban ïaid shakhmat halor ka jingthmu ban pynkynriah ïa ki nongshong die madan.”
“Ngim shym la ong ba ngin ym kynriah hynrei ngin kynriah katkum ki kyndon” pynpaw ka Kong Angela ryngkat bad ka jingbanjur ïa ka jingdonkam ban pynbeit shwa ïa ki jingduna.
Halor ka jingkylli ia kitei ki jingduna, ka nong Rngad ka la ong, “Naduh kaba sdang, ngi lah ong ban leh ïa ka Survey ban tip ïa ki nongshong dukan bad ki nongdie madan kiba dei hok, ban pynlong ïa ka jingkam bad ka jingpyrshah ban ïohi la katei ka survey kan kynthup shisha ïa ki nongdie madan kiba dei hok lane kin don ne em ki ban shim kabu ïa kane bad kane ka kam ka la poi shaduh u pud ïa ka jingai ïa ki laisen. Kum ka dkhot jong ka PTVC, ngi lah kdew ba ngi tip thikna ba ki don ki briew kiba don ïa ki dukan kiba heh, hynrei ki la ïoh pat ïa ka laisen ban shong die jingdie ha madan.”
Ka la bynrap ruh da kaba ong, “Kumta ngi la dawa ba donkam ban pynbeit noh ïa kitei ki jingbakla bad jingduna hashwa ban ïaid shakhmat bad katei ka kam namar phin sa thaw shuh shuh ïa ki jingeh lada phi ai ïa ki laisen sha ki briew ki bym dei hok ban ïoh.”
Na ka liang ka Kong Rangad ka la ong, “Kawei ka longkmie kaba la shong die jingdie hangne mynta la palat 30 snem hynrei kam shym la ïoh ïa ka laisen. Kane ka pyni ba ka jingleh ïa ka Digital Survey ka la pulom.”
Ka la kynnoh ruh da kaba ong, “Ka Digital Survey kam shym la don ïa ki dur ki dar jong ki nongdie madan, kaba ka kyrteng ka jong ki ka la mih ha ka thup kyrteng.”