Ngin kiar ïa ki jingkawang ktieh ïa kiwei kam pher la ki kynthoh katno katno ïangi : Dr. Ampareen Lyngdoh

Shillong, K’Lyngkot 27 : Ka nongïalam jong ka National People’s Party (NPP) kaba dei ruh ka Myntri sorkar ka jylla, Dr. Ampareen Lyngdoh ha ka sngi Nyngkong ka la ong ba kum ka party kin kiar katba lah na ka jingkawang ktieh ïa kiwei kampher la kiwei ki kynhun ne ki party ki pyrshang ban ïalam bakla ne kynthoh katno katno ruh.
Haba kren bad ki lad pathai khubor hadien ba u kyrtong ka NPP na Laitumkhrah – Malki Bah Fantin J Lakadong u la pyndep ia ka jingthep kyrteng, na ka liang ka Dr. Ampareen ka la ong, “Na ka liang ka party ka la rai ba ngin kiar katba lah na ka jingkawang ktieh bad ngin kren tang beit ïa ki kam ba bha ba ka party ka la leh.”
Ka ong ruh ba kiwei ki party ki lah ban kynthoh hynrei na ka liang ka NPP kan ieng beit ha ka nongrim bad da ka jingkyrmen bad jingshaniah ba kin ïoh beit ïa ka jingkyrshan jong ki paidbah.
“Bun kiba sngew rem bad kynnoh ba ngi thombor haba ngi ong ba khlem ka jingïatrei lang bad ka sorkar jylla kano kano ka Executive Committee kan shem jingeh bad kumta ki paidbah ki hap ban shim ïa kane ka rai kam pher watla ki don bun ki jingkynnoh,” ka la bynrap biang.
Nangta ka ong ruh ba baroh ki kyrtong ka party kin rah shakhmat ïa ki thong treikam kumba ka party kala dep ban buh mawnongrim ban pynshai sha ki paidbah.
Ka ong ruh ba ki buh thong ba ïa ka jingpynbeit pud kin sa lah ban pyndep noh baroh shwa u snem 2028. “Ngin peit ba kan ym don kum kata ka jingkynnoh ba ngi pynkheiñ ïa ka Land Transfer Act bad wat ju ngeit khlem nongrim. Ki paidbah ki dei ban don ka jingshaniah ba kano kano kaba ngi leh ka long tang na bynta kawei ka jingthmu kata ban rah ïa ka jaidbynriew Khasi Jaintia bad Garo sha kawei pat ka kyrdan,” ka la bynrap biang.
Nangta ka ong ruh ba ka jingkren ïa ki kam pynroi kam dei satia tang ha kawei ka tnad sorkar hynrei baroh ki ieng sakhi ba ka long salongsar.
Shwa kane ka la ong ruh ba ka dei ka kamram jong ki Liang Pyrshah ban kynnoh ne kynthoh hynrei kane kan ym khang lad pat ïa ki kum ka sorkar ban ïaid shakhmat bad bteng ban trei ia ka kam na ka bynta ban shakri ïa ki paidbah bad ïa ka jylla hi baroh kawei.
Ha kajuh ka por ka la pynpaw ruh ïa ka jingkyrmen ba ka party kan ïoh biang ïa ka jingiatrei lang na ki paralok na ka bynta ka samoi treikam kaban wan.