Ngim kyrshan Paiem Ainam ne Marremdor, hynrei bud ïa ki riti dustur, kyntu ka Sengkhasi Niamtre ïa KHADC

Shillong, Jylliew 02: Ki Rangbah na ka Sengkhasi Sengkmie bad kumjuh na ka Niamtre ki la kyntu ïa ka District Council bad kin bat ïa ka riti dustur kaba la sdang naduh ki por u mynbarim bajah ym pat ban pynkheiñ ïa ki naba lada sdang ban mushlia ïa ka riti dustur yn ym artatien ba ka jaitbynriew kan sa duh sa dam.
U Vice Principal ka Seng Khasi Sengkmie Mawkhar u Bah P D Nongrum bad u General Secretary ka Seinraij Jowai u Ma Arwotki Sumer u la ong ba kum ka Niam Khasi Niamtre ba dang ksoh hapoh ki riti dustur la ïohi ïa ka jingma haba la don kiba la sdang ban pynpait ïa ka jaitbynriew lyngba ka niam bad ïa kane la ïohi lyngba ka jingbym ai sanad ïa u Syiem ha Hima Sohra u Paiem Marremdor Syiem bad kumjuh ruh ka jingweng noh ïa u Paiem Ainam Manik Syiem bad kumjuh ruh ha ki snem ba la dep ba la don ka jingshah pynthut halor ka jinglehniam lum Shyllong, ka jingpynsangeh ïa ka niam ïap ha Mylliem bad kiwei kiwei.
Haba ïadei bad ka jingtuklar ïa ka kam Syiem ba la jia ha Hima Sohra bad hima Mylliem u Rangbah P D Nongrum u la ong ba kim ïashah ïa kino kino ki Syiem hynrei lada thung ne weng ïano ïano dei ban ïaid katkum ka riti dustur.
U la ong ba shen na ka liang jong ki kin sa phah da ka jingthoh sha ka KHADC ban kyntu ïa ka ba kan bud ïa ki riti dustur hynrei ym ban pynduh pyndam noh ïa ki ïoh kin duh jait noh.
“Halor ki jingïakren ha ki por mynshwa, bun kiba la leit long Khristan bad ha kito ki por ngi la kylla long rit paid hynrei kane ka jingleit kylla niam ka shong hi ha la u briew. Ha u 1846 shaneng ka la don ka jingpyrshang ban pynduh ïa ki riti dustur bad dei halor kane ba mynta la 126 snem ngi la ïaineh ban pynneh ïa la ka riti dustur bad la shongsuk shongsaiñ nadong shadong la ka long ha ka shongkha shongman la imsuk imsaiñ. Ha ka imlang sahlang ruh kam ju don ka jingïapher jaitbynriew. Hynrei kynsan kynsan la wan ka jingpynïapher niam kaba la sdang naduh u snem 2017 na Mylliem ba la pynsangeh ïa ka niam ïap ïa kiba ieid ba thoiñ haduh ban da poi sha High court kaba la pynksan ïa ka seng Khasi bad la lah ban pyndep ïa kane ka leh niam bad ka ïingkashari ka la daiñ kuna ruh ïa kito kiba pynthut,” ong kitei ki riew rangbah.
Na ka liang jong ki, ki la pynpaw sa kawei ka jingjia bad kata ka dei ka nguh blei Lumshyllong da ka Hima Mylliem la pynthut bad hap leit biang sha Court bad ki la jop ban pyndep ïa ka nguh blei Lumshyllong.
“Kaba sngewsih shuh shuh ka long ki bor synshar kum ki ADC ban ïada ïa ki riti dustur, hynrei kim ïarap ïa ngi kiba ksoh ha ka niam Khasi haba iadei bad kane ka bynta, kumta ngi kyrpad ïa ka District Council ba kan shim ïa ki lad ban ïada ïa ki rit paid ki Khasi, da kaba pynneh ia ki riti dustur. Halor ka Hima Sohra u Syiem khynnah Marremdor Syiem la dep ban pyndep ïa baroh ki riti dustur, ka lehniam ïap bad kumjuh ruh ka jingjied Syiem katkum ka riti dustur, hynrei la pynsangeh ban ai sanad bad la thung da u Acting Syiem u bym dei uba bat ba ksoh ïa ka niam Khasi. Ha Mylliem ruh la pynsangeh ïa u Paiem Ainam Manik Syiem na ka daw ka jingbym noh synniang sha ka Council, ngi buh jingkylli ba balei kam mih naduh mynshwa ka mih pat hadien ba la ïoh ka lad ban pyndep ïa ka niam lei Shyllong, hato kadei ba don kaei kaei mo kaba wanrah ïa kane. Kumno ki Syiem ki bym dei shuh na ka niam Khasi ki lah ban lehniam ne long Syiem,” buh jingkylli kitei ki rangbah.
Ki la pynpaw ka jing-ima ba ha kine ki sngi ba mih ka jingpynïapher jaitbynriew lyngba ka niam. “Lada ngi pynduh ïa ki customary law ne ki riti dustur kan long ka jingma ïa ki riti synshar. Ngi kyrpad ba kiba don ha ka bor ba kin dei ban pule bha ban tip ïa ki riti dustur, lyngba ki jingthoh jong ki nongthoh kot bapher bapher. Na ka jinglong rit paid jong ngi, lada bakla wiak ka jaitbynriew jong ngi ka lah ban duh ban dam bad ïa kane hap kynnoh ba dei ma ngi hi kiba khynniat ïa ka jaitbynriew sha riat,” ki la ong.
Haba kylli halor ka jingkyrshan ia kine ki Syiem kiba la shah weng ha ka KHADC ki la ong, “Ngim kyrshan ïa u Paiem Ainam ne Paiem Marremdor hynrei ka District Council ka la ïaid lait na ki riti dustur, kumta kadei ban bud katkum ki riti dustur. Ngin sa buh da ka jingthoh sha ka Council ban sngewbha ba ka jinglong kogsan (mandate) jong phi kadei ban pynneh ïa ki riti dustur sngewbha bud ïa ki, ïano phi jied Syiem ym lei lei hynrei bud ïa ki riti dustur.”