Mawkyrwat, Lber 11 : Ka Mawkyrwat Constituency Socio Economical & Political Awareness Committee (MCSEPAC) kaba dei hapoh ka jingïalam jong u bah Sounder Strong Cajee kum u President ha ka sngi saitjaiñ jong ka taïew ka 9 tarik u Lber, 2024 u la lum ïa ka jingïalang paidbah ne ka General Meeting kaba tang ïa ki nongïalam na ki dong bad shnong bapher bapher ha ophis treikam jong ka Trinamool Congress Party Mawkyrwat Block ha Mawkyrwat, South West Khasi Hills District.
Kane ka jingïalang ka long kum shibynta ban pynshai paidbah ha kaba ïa dei bad ka Election MP 2024 sha ka Lok Sabha da kaba ïathir bad ïa tai ïa kiba bun tylli ki mat bad ha kane ka jingïalang ki la rai bad da kawei ka sur ka la mih ba ha kane ka kynti kum ki nongkyrshan jong ka TMC kin sa leit ban ai jingkyrshan tang ïa ki ar tylli ki party kata ïa ka Voice of People’s Party (VPP) lane ïa ka Indian National Congress (INC).
Hadien ka jingïalang, u bah Sounder Strong Cajee kum u President jong ka MCSEPAC haba kren ha ki lad pathai khubor u la pynpaw ka jingaikhublei na ka bynta baroh ki nongkyrshan kiba la ai ka kti ka mon ka kti ka diang ha kane ka MLA Election kaba la dep, watla ka TMC Mawkyrwat Block kam shym la poi sha ka thong jong ka jingjop. Ha kaba ïa dei bad ka MP Election jong mynta u snem 2024, u bah Cajee u la ïathuh ba kiba bun ki paidbah kiba la poi ha ka jingïalang na ka TMC Mawkyrwat Block ki don ka jingthrang ba namar ha kane ka election ban wan na ka TMC ymdon kyrtong ki ban ïa khun, kumta ki la don ka jingthmu ban leit ai jingkyrshan noh ïa ka VPP bad ka INC.
“Nga ngam don jingpyrshah ïa kata, hynrei ka sur hi ka mih na ki paidbah ba tang ha ki ar tylli ki party ka Voice of People’s Party (VPP) lane ka Indian National Congress (INC)”, ïathuh u bah Cajee hynrei halor kane u la bynrap pat da kaba ong ïa ki nongkyrshan ba da lei lei kim dei ban kyrshan ïa ka National People’s Party (NPP) namar kane ka party ka la dep pyni lypa ïa ki kam ki bym lah ban pdiang”, u la ong bad kata ka dei namar ka jingleit kyrshan jong ka MP na Tura Parliamentary Seat ban pyntreikam ïa ka CAA.
Ha kaba ïa dei bad ka MDC ne MLA Election, u bah Sounder Strong Cajee u la pynpaw b akum ka party TMC na Mawkyrwat Block ka long kaba la khreh ban ïakhun. Ïa ka jingïalang la pynïaid da u General Secretary ka MCSEPAC, u bah Remdor Shylla ha ryngkat ka jingïadonlang ki nongïalam ba hakhmat jong ka TMC Mawkyrwat Block.
