Ha ki khyndiat bnai kiba ladep, ka NitiAayog, ka la pynmih ia ka Kaiphod halor ka jingdon jong ki briew kiba duk bad ym don jinglyngngoh ba ka Meghalaya kadei ka jylla kaba lai ha ka jingdon ki briew kiba duk ha ri India. Ka Meghalaya ka shu tam tang ia ka Bihar bad ka Jharkhand ha ka liang ka jingbun eh ki briew kiba duk. Kane ka report ka wan tang hadien khyndiat bnai ba ka NitiAayog, ka pynmih ia ka report ba ka Meghalaya kadei ka jylla kaba duk tam ha ka thaiñ shatei lammihngi bad kaba ar ha ri India, ha kaba ka shu tam tang ia ka Bihar.
Ka Niti Aayog kam dei satia ka Private Firm na kynhun bym don jingïasnoh bad ka sorkar, hynrei kadei kawei na ki bor treikam la thaw da ka sorkar pdeng ha ka jaka jong ka Planning Commission jong ka ri India. Kumta haba ka pynmih ïa kiba kum kine ki Kaiphod, ym don mano mano ba lah ban kyntait ne ban ong da kumwei pat. Hynrei hap ban pdiang ba ka long ka jinglap ne ka kaiphod kaba shisha.
Ki khyndiat bnai baladep, ki la iohi ia ka Kaiphod ba la wanrah ha ka rukom jong ka Discussion Paper ba la thoh da u Prof. Ramesh Chand, uba dei u dkhot jong ka NitiAayog da kaba shim ruh ïa ka jingiarap jong ka United Nations Development Programme (UNDP) bad ka ka Oxford Policy and Human Development Initiative, la pynpaw ba ka ka jingpynpaw ne ka projection na ka bynta u snem 2022-2023, ka jingdon ki briew kiba duk ha Meghalaya ka long 27.79 percent. Ka Bihar ka don 33.76 percent bad ka Jharkhand ka don 28.81 percent.
Ñiuma ka rukom kheiñ ne ka rukom buh ïa kane ka paper ka long kaba eh ban sngewthuh bha da u lik u lak, hynrei ka pawshai hi ba ka Meghalaya kadei ka jylla kaba lai ha ka jingduk ha ri India.
Haba ki mih ki report ne ki jingthoh kiba kum kine, kiba bun lehse kin kylli, kumno ka jylla Meghalaya kan duk haduh katne katne kan ïahap ryngkat bad ki jylla kum, ka Bihar bad ka Jharkhand ne kumno kin kham duna kiba duk sha Uttar Pradesh ne Madhya Pradesh ban ïa ha Meghalaya. Namar kiba bun hi ki ju ong ba ha Meghalaya ym khamlap ïa ki briew kiba dang shong ha ki ïing skum ne ki briew kiban duh bam wat tang ha ka shisngi ruh. Lehse ym sngewlah ban pdiang ruh.
Pynban lada phai ne ïaid hi kylleng kylleng yn lap ba ki dang bun ki briew jong kane ka jylla kiba im hapoh u laiñ jong ka jingduk. Ka daw ka long ba ki dang bun bha ki nongshongshnong jong ka jylla ki bym don la ka jong ka ïing ka sem, ki bym don la ka jong ka jaka ban rep ban riang ne kita ki landless people. Wat lada kiba bun ki sngew sarong ba ha Meghalaya ka ka jaka ne ka khyndew ka shyiap kadei jong u paidbah, ym jong ka sorkar.
Ka jylla ka i riewspah namar lah ban ïohi ïa ki ïing ki sem kiba heh kiba don bun mala. Nangta ka jingbun ki kali bad kiwei kiwei de ki jingdon jingem lehse kiba pyni riewspah ïa ka jylla. Hynrei ki dang bun bha pat ki briew ki bym don wat tang ka kam ka jam ne ka kama ka kajih ban long ka jingpyndap ïa ka ïing ka sem. Ki don ruh kiba shu im ja ban kamai mynstep bad bam mynmiet.
Ka sorkar ka la pyrshang ban pynmih ïa ki prokram kiban ïarap ban kyntiew ïa ka ïoh ka kot bad ka kamai kajih jong ki paidbah. Hynrei kiba bun pat kiba kum kine ki lad kidei kiba la pynmih da ka sorkar pdeng bad tang khyndiat eh kiba la pynmih na la ka jong ka jylla. Ka jingthaw ïa ki Self Help Group kiban long ki kynhun ban iarap ban kyntiew ïa ka ïoh ka kot ne ki prokarm ban weng ïa ka jingduk. Hynrei kum kine ki prokram pat ki dang duna bad ki briew ruh kim pat sngewthuh bha ban ïashim bynta ne ban pdiang.
Nangta ka jingban jong ka jingduk kadei namar ba ki lad kamai kajih ki duna bha hangne, ha kaba ki karkhana ki dang duna bad lada ki don ruh kim aikam aijam ia ki paidbah kumba kidei ban ai. Nangta ki kompeni kiban iarap ban aikam aijam ia ki briew ruh ki dang duna bha.
