Shillong, Lber, 11 : U Myntri Rangbah ka Jylla Conrad K Sangma mynta ka sngi Saitjain, ula ot ribon ïa ka ‘My City’ Campaign, ka jingïalap ban pynkhuid ïa ki shnong ki thaw bad plie ruh ïa ka ‘Reimagining Streets’ nalor ka jingïashim bynta ha ka jingpynkhuid ïa ka surok Dhankheti.
Haba kren ha ka jingïalang kaba la pynlong ha Moreau Institte of Integral Training (MIIT) hadien ka jingpynkhuid ïa ka Dhankheti Parking Lot, u Myntri Rangbah ula ong ba ki kynhun bapher bapher, ki riew shimet bad ki Tnad Sorkar kila leh ïa ki kam hala ka jong ka bor ka sor bad ka long kaba donkam ban don ka jingïatreilang kawei jong baroh.
“Kane ka jingpynkhuid shnong ba ngi leh mynta ka dei kaei kaei kaba ngi kwah ban leh manla ka lai bnai namar ki jaidbynriew bad ka kolshor jong ngi ka dei ban pynlong ïa ki kyntoit bad ki shnong ki thaw kiba khuid” ula ong haba bynrap ba bun bah ki shnong ki thaw kila leh hi ïa kane ka kam khlem kano kano ka jingkyrshan.
U Myntri Rangbah ula ong “Ha ka sien ba nyngkong, ka Sorkar ka la shim ïa kane ka kolshor jong ngi ban pyntyllun shakhmat ha kaba kan sa ai song pisa man ka lai bnai ban ïapynkhuid ïa ki shnong ki thaw”.
Ula ong ruh ba kane ka ‘My City’ campaign kan sdang shuwa ha manla ki District Headquarter bad suki suki kan sa leit sha manla ki shnong ki thaw ka Jylla. U Myntri Rangbah ula ong ruh ba ka jingthmu hi kan long ym ba tang shisngi ngin lah ban pynkhuid ïa ka Nongbah lane ka sor baroh kawei hynrei ban wanrah ïa ka jingkylla ha ka jingmut jingpyrkhat jong ki briew.
“Man ka por ba ngi pynkhuid ngi hap ban sdang sngewthuh ba ngi hap ban shim ïa la ka bynta bad ai ba baroh ki nongshong shnong ha ki sngi ba ka Sorkar kam bei pisa ïa kine ki jingpynkhuid shnong, kin shim ïa ka jingkitkhlieh ban pynthikna ba ngi pynneh ïa ka jingkhuid jingsuba ka sawdong sawkun bad ba lait na ka jingbret niut” ula ong.
Haba pynpaw ba ki samla pule bad ki samla ki don ïa ka bynta kaba khraw bha ha kane ka campaign, ula ong “Ki samla haba ki sdang ïa ka movement, ka lah ban long kaba khlaiñ bha” bad bynrap ba ka thong kaba bun hi ka long ban pynsngewthuh ïa ki nongshong shnong ka Jylla ba kin pynneh ïa ka jingkhuid jingsuba ki jaka sor bad ki sor rit. Haba kren halor ka jingmut jong ka ‘Reimagining Street’, u Conrad ula ong ba kane ka dei ka sienjam ba la shim ban pynlong ïa ki surok kiba lah ban ïaid kjat bad ong “Ngi don ia ka jingangnud ban shna ïa ki lynti ïaid kjat ba 10-15 kilometer, pynheh ïa ki lynti ïaid kjat bala don lypa kat haba lah toi, ban shna lynti ïaid kjat biang ki ban ïasoh kawei ïa kawei pat khnang ba kan aimynsiem ïa ki nongshong shnong ba kin ïaid kjat”.
U Myntri Rangbah ula kren ruh ïa ki sienjam ba la shim kum ka jingpynïaid ïa ki cable waïar napoh khyndew, ka jingai rong ïa ki jingtei, ka jingshna ïa ki lynti iiad kjat bad kiwei kiwei, ban pynitynnad bad pynkup dur bhabriew ïa ka Nongbah. Ula pyntip ruh halor ki prokram bapher bapher jong ka Sorkar ban pynlong ïa ka Jylla bad ki jaka sor, ki shnong ki thaw kiba khuid bad ba kynsai.
U Myntri Rangbah ula sam ruh ïa ki song pisa da ka cheque sha ki nongmihkhmat jong ki Dorbar Shnong bapher bapher bad pyllait paidbah ruh ïa ka Reimagining Streets Initiative Booklet ha kane ka sngi. Ki samla pule college, ki dkhot ka NCC bad NSS, ki dkhot jong ki Dorbar Shnong bad ki SHG kila ïashim bynta ha kane ka prokram.
