Ngi la tip shai ba ki heh ka TMC ki la don ka jingïakren bad ka BJP; kynnnoh u Bah Pala

Shillong, Lber, 21: U President ka Meghalaya Pradesh Congress Committee (MPCC) Bah Vincent H. Pala u la kam ba ka jingbym treh jong ka Congress ban ïatreilang bad ka All India Trinamool Congress (AITC) ha Meghalaya ka dei na ka daw ba lada ki nongïalam ka ATIC ki leit ban pynïasoh sha ka BJP, kan sa paw pat hadien habud ba dei hi ka Congress kaba phah ïa ki nongtrei sha ka BJP.
Ha ka jingïakren bad ki lad pathai khubor ha ka sngi Palei u Bah Pala u la ong, “ha kaba ïadei bad ka jingïatreilang bad ka Trinamool Congress ym dei tang ma nga marwei ba shim ïa ka rai. Ma nga bad u Bah Ronnie ngi la leit sha Delhi ban ïakynduh ïa ki nongïalam ka TMC. Nalor kata, u Bah Charles Marngar, Bah Gabriel Wahlang, Dr. Celestine Lyngdoh bad u Bah Pynshngaiñ N. Syiem ngi la shong jingïalang bad ngi la pyrkhat bha lada ngi phah ïa ki nongkyrshan jong ngi ban kyrshan ïa ka TMC ha Garo Hills lashai pat lada ki (TMC) ki leit sha ka BJP, ka pyni ba ngi phah ïa ki nongtrei jong ngi sha ka BJP, namarba ngi la tip shai ba ki heh ka TMC ki don ka jingïakren bad ka jingïasngewthuh jingmut bad ka BJP.”
“Ka kamram jong ngi kum ki nongïalam ka Party, ka long ban batai ïa ki heh jong ngi ha Delhi ruh. Ka jingmut jingpyrkhat jong ki nongïalam ka TMC ha Shillong ka ïapher bad ka jingmut jingpyrkhat jong ka TMC ha West Bengal,” la ong u Bah Pala.
“Hangne (ha Meghalaya) kin sa pynïasoh bad bun kiba la khot ïa ki briew jong ngi ban leit sha ka BJP. Ka jingïapher kam dei hapdeng jong nga bad u Dr. Mukul Sangma hynrei ka jingïapher ka long ba ngi ladep tip ba ki la thmu ban mih na ka TMC bad ha kawei ka sngi kin sa pynïasoh sha ka BJP. Balei ngin ngop ha kata ka jingriam jong ki. Kam dei ba nga ïapher jingmut ma nga bad u Mukul,” la bynrap u Bah Pala.
“Nga la lei nga la ong ïa kine (nongïalam ka Congress) khie leit khot ïa u Dr. Mukul ban wan (phai biang sha ka Congress) bad nga kloi ruh ban ieh ïa ka kam President jong ka party bad ngin ai (ïa ka kam President) ha uno uno (u briew) uba u (Mukul) mon hynrei ma u (Mukul) hi u ong ba ka party Congress ka la hiar bad kam myntoi hi ruh ban phet na ka party Liang pyrshah sha ka party Liang Pyrshah bad dei ban ïoh hi ïa ka bor,” la kam u Bah Pala.
Haba pynksan ba ka Congress kam salia lada don ha ka Liang Synshar ne Liang Pyrshah, u Bah Pala u la ong, “ngi pat haba ngi treikam paidbah ngim pyrkhat hi ruh ïa kata ka Liang Pyrshah ne Liang Synshar bad lada ki paidbah ki bynshet ha ngi ïa ka bor ban trei ngin trei katba lah la ngi don ha kano kano ka kyrdan.”