Ngi la don lypa 33 ngut ki MLA, ka NPP kan synshar marwei ha u 2023: Macmillan Byrsat

Nongstoiñ, Jymmang 23: U Bah Macmillan Byrsat, MLA ka Nongstoiñ u ba long ruh u President ka NPP West Khasi Hills u la ong ba ka NPP ka la don lypa mynta 33 ngut ki MLA kynthup ïa ki MLA na ka Congress, PDF, HSPDP bad na ka TMC kiba la pynthikna ban pynïasoh bad ka party. Hynrei, ïa mynta kine kim pat long ban mih namar ka don ka aiñ kyntiap seng bad u la pynthikna ba ha ka election 2023, ka party NPP kan sa ïoh ban synshar marwei ha ka jylla.
Ïa kane u Bah Macmillan Byrsat u la kren ha ka jingïalang pynskhem ïa ki nongkitkam ba thymmai jong ka National People Youth Front (NPYF) West Khasi Hills kaba la long ha ka 23 tarik u Jymmang 2022 ha Bishop Hall Nongstoiñ.
U Bah Macmillan Byrsat u la pynkynmaw ruh halor ki kam kiba ka sorkar MDA hapoh ka jingïalam jong ka Party NPP ka la leh, ba kynthup ïa ka jingpyndam noh ïa ka aiñ ïathoh arsien, ka jingpynphai biang ïa ka jingaplai ïa ki Birth Certificate sha DC ophis, ka jingpynbeit ïa ki kam khappud, ka ishu Inner Line Permit (ILP), ka ishu Them motor, ka Land Bill, ka jingïakren ïasuk bad ki seng kieng atiar, ka roi ka par bad kiwei kiwei.
Katba na ka liang u Bah Gigur Myrthong, MLA ka Mawshynrut u ba long ruh u Working President ka NPP, West Khasi Hills u la ban jur ba ki samla ki long ka lawei na ka bynta ka jaitbynriew. Kumta ka Party ka donkam ïa ki samla ban trei shitom bad ban ïa tylli kawei, ban pynthikna ba ka party kan ïoh ïa ka jingjop ha baroh lai tylli ki Constituency jong ka District.
Na ka liang u Bah Bajop Pyngrope pat u la ïathuh ba ka jingwan pynïasoh jong u sha ka Party NPP, ka dei namar ki kam kiba kane ka party ka la trei na ka bynta ka jaitbynriew, ba kynthup ïa ka kam khappud kaba ki paidbah ki la thrang bad angnud baroh shikatta.
U la ong ba ka jingpynbeit ïa u pud u sam ka la long katkum ki nongrim bad lait noh tang katto katne ki shnong kiba ju thep vote sha Assam kiba la shah pynngat sha Assam, hynrei kiwei pat ki don beit hapoh ka jylla Meghalaya.
Ha kane ka sngi ka party ka la ïoh ban pynskhem ïa u Bah World Champion Paliar kum u president ka NPYF, West Khasi Hills, arngut ki Vice president ba kynthup ïa u bah Pynshaibor Lyngdoh bad Shailambok Marbaniang, Lai ngut ki General Secretary ba kynthup ïa u Bah Bendrowell Hashah, u Bah Kyntonbor Mawsor bad Bah Bansaïohbor Mawtyllup, hynriew ngut ki secretary, ki dkhot ka Executive Committee bad kiwei kiwei.
Ïa kine ki nongïalam bad nongkitkam ha ki kyrdan bapher bapher jong ka NPYF la ïoh ban pynskhem ban pyntian smai da u State President ka NPYF u Bah Kitboklang Nongrem.