Mynta ka la dei ka jingong, “katba nangrep katta nangsyrdep”

Mawkyrwat, Jymmang 23: Ki nongrep kiba ju im kyndoi ja kpoh tang ha ka kam rep kam riang ha kine ki sngi kiba mynta ki la sdang ban duh mynsiem bad ïa kynduh jingeh shikatdei kumno ban pyntyllun ïa kane ka kam namar katsha ba phai ka nem sniew i mat ka la sdang ban lap ïa ki ha kine ki sngi.
Kaei kaba pynlong ïa ki nongrep ba kin duh mynsiem ka long ba haba phai ha ki ar snem kiba la leit ka don ka jingwan lynshop jong ka khlam corona virus ha kaba kiba bun ki nongrep kim ïoh lad shuh ban rep ha ka rukom kaba dei namar ka don ka jingshah khangdam hynrei ha ka rep ka riang ban lum ïa u symbai pat ka dang ïa biang watla ka don ka jingpynthut. Katba haba phai ha une u snem ba mynta pat ka jingrep ka la long laitluid ymdon jingteh jingkhum shuh ne jingpynwit ha ka ïaid ka ïeng, hynrei kaba sngewsih ka long ka don pat ka nem sniew ha kaba naduh ba u jingthung u la sdang ban khie san bad heh ne ai bam ba u soh ba don hapoh khyndew un heh un plung hynrei wan jia pat ba u kynja khñiang u la wan hiar thma da kaba bam lut khiot ïa ki sla jong u phan. Ym tang kata da ka jingwan tyllep ka um saw ruh ka la long kawei na ki daw jong ka jingpynjurlor ïa u phan.
Namarkata, halor kine ki jingjia haba ïoh ban ïa kren bad ki katto katne ngut ki nongrep ki la pynpaw ba kiba kum kine ki jingjia kim pat da ju jia koit ha kine ki phew snem kiba la leit noh namar haba phai ha ka jingshah pynjot ha ki khñiang lei lei kam pat da jur than kumba long ne ïohi kum ha une u snem 2022 ha kaba ki khñiang kiba dei ki nongshun jong u jingthung ki la sdang bun bad ki la sdang ban khlaiñ bor ban ïa u khñiang uba dei u ba ker ba da na ka jingwan hiar thma jong ki nongshun (para khñiang).
Haba phai pat ha kaba ïa dei bad ka jingshah lynshop ha ki bor jong ka mariang ne na ka jingshlei jong ka um saw, na ka liang ki nongrep ki la pynpaw ba kane ruh ka long kawei na ki daw ba u mar rep jong ki u duh bor noh ban heh ban san ne wat ban lum ïa u ne ban pyndonkam ha ïing namar u phan tang shu lah dei um (shah tyllep), um long shuh ban pyndonkam bad lada tih ne khlong ruh hap ban shet noh bad pyndonkam noh namar kumba ka la jia ha kine ki khyndiat sngi ba haba ki nongrep haba ki la leit ban tih bad rah ïa u sha ïing tang ha ka shimiet u la kylla pyut noh. Kane ka la buh jingeh shikatdei ïa ki nongrep namar lada u long tang ha kane ka dur kin sa mad jingeh ban ïoh ïa u phan ban buh symbai ban ïoh ban thung sa ha kiwei pat ki snem.
“Ha ki snem kiba la dep, ngi ju ïoh ban lum ïa u phan uba kham heh bad ba plung bha, katba mynta u snem pat ngi ïoh ban lum tang da u phan uba long kat u marble”, ong ki nongrep bad kane ka long kaei kaei ka pyndiaw mynsiem ïa ki.
Namarkata, ki la buh ka jingkyrpad ïa ki bor ba dei peit ha ka kam rep kam riang ba da lada ki don ka lad ka lynti kin sngewbha ban ai lem ki lad jingïarap na ka bynta jong ki nongrep khnang ba ha ki snem ki ban sa wan kin lah ban pynïaid ïa kane ka kam rep kam riang ha ka rukom kaba dei.