Shillong, Kyllalyngkot 30 : U Nongïalam ka UDP uba dei ruh u Myntri sorkar u ma Kyrmen Shylla u la pynpaw ba ka Regional Democratic Alliance (RDA) ka kyrmen ba u kyrtong jongka u bah Robertjune Kharjahrin un jop na kane ka Shillong Parliamentary Constituency. Haba kren bad ki nongthoh khubor u ma Kyrmen u la ong ba nalor ki MDC ngi don 14 ngut ki MLA ba kynthup 12 na ka UDP bad 2 na ka HSPDP kumta kine baroh kin ïatrei lang ban wanrah ka jigjop don burom ïa u kyrtong ka RDA.
“ Kane ka dei ka jingkyrmen ym tang ka RDA hynrei ka long ruh ïa baroh haba ki ïakhun ïa ki election hynrei nga sngewthikna ba u kyrtong jong ngi un leh bha bad ïoh ïaka jingjop don burom” ong u ma Kyrmen.
U kyntu ruh ïa ki paidbah ban ailad mynta ka kynti ïa u kyrtong ka RDA ban leit mihkhmat sha Delhi bad hangta yn sa ïohi la u kyrtong jongka u leh kumno hapoh Parliament.
“ Nga kyrpad ïa ki paidbah ban kyrshan ïangi bad ngin sa pyni ïa phi da ka kam kata ban long nongïalam ym tang ha ka jylla hynrei wat ha Delhi ruh. Ka RDA kam salia wat la ïabun ki nongïakhun ïa ka election ruh namar ka thong jongka ka long beit ban wanrah jingjop ïa u kyrtong jongka” pynkut u ma Kyrmen.
