Pynkhreh ka Sorkar ban pynrung ïa ki ktien tynrai, deiriti, put ka tem bad kam ïalehkai ha ka jingpule

Shillong, Kyllalyngkot 30 : U Myntri ka Tnad Pule Puthi Rakkam Sangma mynta ka Sngi Ba-ar, ula pyntip ba ka Sorkar Jylla pynkhreh ban pynrung lang noh ïa ki ktien tynrai, ka deiriti tynrai, ka put ka tem bad ki kam ïalehkai ha ki curriculum jong ki skul ka Jylla.
U Myntri u pyntip ba ka Sorkar kan sa iasyllok bad ki stad ki jhad, ki kynhun bapher bapher lem bad ki lai tylli ki Autonomous District Council (ADC)-ka KHADC, JHADC bad GHADC ban lah pynurlong ïa kane ka kam. U pyntip ba kane ka jingïasyllok kan sa long ha u bnai ban wan.
“Ngin sa ïashong jingïalang bad ka KHADC, JHADC, GHADC bad ruh ka Khasi Author Society bad kiwei kiwei ki kynhun. Ngi kwah ban ïasyllok kumno ba ngin jam shakhmat ha ka ban kynthup lang ïa ka deiriti tynrai bad ki jingleh niam leh rukom nala tynrai jong ki nongshong shnong ka Jylla ha ka pule dangle” ong u Myntri.