Jowai, K’Lyngkot, 30: Uwei u Rangbah ba la iaw ka rta na ka shnong Kyndongtuber ïa uba la tip kyrteng kum u ma Wilybert War, 79 snem ka rta ula pynpaw ïa ka jingbynñiaw kaba jur halor ka rukom treikam jong ka Sub-Center (Dispensary) kaba don ha Kyndongtuber, West Jaiñtia Hills District.
Utei u Rangbah haba ïathuh ha u nongthoh khubor mynta ka sngi ula ong ba hadien ka jingmynsaw ka kjat na ka daw ka jingshah ban ha u maw kaba la jia hynnin ka sngi 24 tarik ha ka por 11 baje mynstep, ula leit wad jingsumar na katei ka jaka sumar sorkar kaba don hajan shnong ha ryngkat ka snam kaba mih, hynrei ynda la poi ha katei ka jaka kala buh pynban ïa u ha ka jingeh kaba khraw namar ka jingbym treh jong ki nongtrei ban pdiang bad sumar ïa u.
U la ïathuh ba kitei ki nongtrei jong ka Dispensary kiba la jubab pynban ïa u da ki kyntien kiba khor da kaba ong “kin don ïa ki tiar ki tar”, kim treh wat tang ban sumar ne tah pynkhuid ïa katei ka snam kaba mih na ka jingmynsaw na ka kjat jong u ruh.
Ka jingbym treh jong kitei ki nongtrei ka Dispensary ban sumar ïa u bad ki bym kwah tang ban peit ïa katei ka jingmynsaw ha ka kjat jong u, mar mar ula leit ban ujor sha u Waheh Shnong jong ka shnong KyndongTuber halor ka jingiehbeiñ jong ki ïa u, da ka jingbitar ula ai jingmut ïa u Waheh Shnong ba kam don jingmyntoi ban don katei ka jaka sumar la dei ban khang noh shi syndon ïa ka.
Haba utei u Waheh Shnong ula ïohi ïa ka kjat jong utei u Rangbah kaba la mynsaw jur na ka jingmih snam ula leit ban ïalam mar mar ïa u da ka kali sha ka jaka sumar kaba don ha Mynsoo PHC bad utei u Rangbah ula ïoh jingsumar kaba biang na kane ka PHC ha Mynsoo.
Shuh shuh ula ong kane ka jingbym suidñiew jong katei ka jaka sumar Dispensary Kyndongtuber ïa ki nongpang kiba donkam jingïarap ha ka por ba donkam, kala buh ïa ki ha ka jingsngewih kaba khraw eh, ula pynpaw ruh kane ka jingleh jong ki ïa kiba duk ba kyrduh bad ka jingshah ñiew shilliang ha ki nongtrei katei ka Dispensary ka long ka bym lah ban pdiang kum ki nongshong shnong, la pynkut u ma Wilybert War.
