Jowai, K’Lyngkot 25: U Krai u dei u wei na ki jingthung mynba rim (indigenous Crop) uba la jan duh jait ha bun ki jaka ha Rilum Khasi Jaiñtia. Bun na ki nongrep kim da kheiñ kor shuh ïa une u jingthung ba kongsan bad u ba ïarap ïaka koit ka khiah ki briew.
Khnang ban kham pynneh pynsah bad pynkhie im biang ïa une u jingthung mynba rim, ka Jaiñtia Hills Development Society (JHDS) ha ryngkat ka jingïatreilang bad ka Caritas India bad KVK Jaiñtia Hills, kila pynlong da ka ‘Millet Festival’ ba shisngi halor ka phang “Healthy Millet Healthy People”.
Ha kane ka sngi la ïadonlang ruh katto katne ki riew shemphang kiba khynthup ïaka kong Larika Challam, Senior Scientist KVK, u Director ka JHDS u FR. Manbha Pakem, U Coordinator ka JHDS u bah Denis Kurkalangbad kiwei kiwei de ki nongshah khot sngewbha.
U Director ka Jaiñtia Hills Development Society ula ong baka Seng ka la pyrshang ban pynkhie im biang ïa une u jingthung naduh ka snem 2018 ha ka shnong Samanong West Jaiñtia Hills District. Shuh shuh ula ong ruh ba ha une u snem ka Seng kala pyrshang ban pynïar shuh shuh ïaka jingrep krai sha kiwei pat ki shnong hapoh ka District. Kumta ha kane ka festival la shim bynta ruh da ki nongrep na kiwei pat ki shnong.
Haba phai shaphang ka jingmyntoi jong u krai, ka kong Larika Challam, kaba dei ka Senior Scientist ka KVK kala kyntu bad pynshlur ïa ki nongrep ba ki don kam ban phai biang ïa rukom rep ki mynba rim khnang ban pynneh pynsah ïaka jingbha bad jingsboh ka khyndew.
Shuh shuh ka la ong ruh ba u Krai udei u jingthung uba khlaiñbor bad u bym juh ïap klumar ha ki khiang jingpang lane ka jingkylla ka mariang (Climate resilient). Kala ong ruh ba une u jingthung u ïarap shibun ïaka koit ka khiah ki briew khamtam ha kane kajuk ba mynta. Kumta kala kyntu jur ïaki nongrep ba kin phai khmat biang sha ka rukom rep myn barim khnang ban pynneh pynsah ïa une u jingthung ba kongsan.
Ha kane ka sngi la don ruh ki program pynbyrngïa bapher bapher bad ka jingïakop shet jingbam na u krai ba la ïashim bynta da ki nongrep na kylleng ki shnong.
Ha kaba kut jong ka prokram la don ruh ka jingsam khusnam sha ki nongjop jong ka Millet contest bad ka jingai sngewbha da ki Symbai Krai ïaki nongrep ka Shnong Lumtrep, Iangkar, Iongsnieh, Thadsning, Iongthma bad Murapushai kum shi bynta ban pynheh pynkhraw shuh shuh ïa ka jingrep ïa une u jingthung.
