Kiar na ka jingshongkha khynnah namar ka ktah ïa ka koit ka khiah: S.M Wanniang

Mawkyrwat, K’lyngkot, 30: Kum shibynta ban kynmaw kyrpang ïa ka National Girl Child Day 2024 ne ka sngi burom ïa ki khynnah kynthei ha ka Ri, ka District Legal Services Authority (DLSA) jong ka South West Khasi Hills District, Mawkyrwat ka la pynlong ïa ka prokram ai jinghikai shaphang kumno ban ïada ïa ki khynnah na ka jingshah leh thombor ne Sexual Offences kaba hapoh ka POCSO Act 2012 bad kumjuh ruh halor ka jingshongkha khynnah bad ba la pynlong hapoh ka Collection Centre NARM, Group, Photjaud War, South West Khasi Hills District.
Ïa kane ka sngi burom ïa ki khynnah kynthei hapoh jong ka Ri India la ju rakhe manla u snem ban ai jinghikai shaphang ka hok ki kynthei bad ban ïathuh lyngkot shaphang ka jingbym ïa ryngkat ba ki kynthei ki ïa kynduh ha ka jingim jong ki. Ha kaba ha kane ka prokram la wan ban ïashimbynta lang da naduh ki khynnah skul, ki dkhot ka Village Organisation (VO) bad kumjuh ruh ki nongkitkam jong ka Shnong Photjaud War.
Ka kong S.M. Wanniang, Judicial Magistrate First Class, South West Khasi Hills District haba kren bad ai jingpynshai halor ki ar tylli ki mat ba kongsan ka la pyntip bad ïathuh ba ka POCSO Act, 2012 ka ïada ïa ki khynnah kiba ha ka karta hapoh 18 snem na ka jingshah leh-beiñ kum ka jingshah ktah kti ïa ki bynta bym dei ban ktah ha ka met, ka jingshah leh jubor bad ka jingpeit ïa ki dur khlem akor. Ka la ïathuh ruh ba ka POCSO Act ka dei shaphang ka jinglong ryngkat ki khynnah kynthei bad shynrang bad ka ïada ruh ïa kino kino kiba shah keh sniew la ka dei kynthei ne shynrang.
Shuh shuh ka la kren lyngkot ruh shaphang ka jingïada ïa ki khynnah na ka jingshah thombor ïa ki bynta jong ka jinglong shynrang ne kynthei (POCSO Act, 2012) bad ai ruh ka jingbthah ha kaba ïa dei bad ka mukot-duma kiba ïa dei bad ka POCSO. Kumjuh ruh ïa ki jingpynshitom ïa kiba thombor ïa ki khynnah da kaba ong, “kino kino kiba ïa kynduh ïa kum kine ki jingjia ki dei ban mih shakhmat ban ai jingpyntip sha ki bor ba halor lada don kiba shah thombor hapoh shnong ne ha ki ïing namar wat lada uta u nongthombor u dei na ka ïing hynrei wat pynsngap dei ban pyntip sha ki bor jong ka aiñ”, ka la ong.
Ha ka jingkren jong ka, ka la ong ruh ba dei ban ïathuh ïa ka snem jong kita kiba shah leh kumta ne shah thombor ban pynpaw da ka jingshlur ha ka POCSO Case bad kumjuh ruh ïa ki lad ki lynti ban shim jingkren ne jingïathuh na kita kiba shah thombor.
Haba kren halor ka jingshongkha khynnah ne Early Marriage, ka kong S.M. Wanniang ka la ong ba ka karta ïa ki shynrang ban shongkha ka long 21 snem bad ka kynthei pat ka dei 18 snem, namarkata, lada don kino kino kiba ka jingshongkha kaba long hapoh ïa kine ki snem dei ban kheiñ ba ka dei ka jingshongkha kaba long pyrshah ïa ka aiñ bad lada don kiba ïaleh pyrshah kin ngat ha ka jingshah pynshitom. Namarkata, ka kong Wanniang ka la pyni bad kdew ruh ïa ki jingeh kiba lah ban mih na ka jingshongkha khynnah kiba long ka jingma kaba khraw ïa ka koit ka khiah jong ka kynthei, ka jingma jong ka jingktah ïa ka longïing ka longsem, ka jingnang kiew jong ka jingieh-noh ïa ka jingshong skul bad kumjuh ruh ka ktah ruh ïa ka ïoh ka kot bad kiwei de ki jingeh. Kumta ka long kaba donkam ba ki kmie ki kpa ki dei ban ïada bad hikai ïa la ki jong ki khun ki kti ban kiar na kaba phah shongkha khynnah.
Kiwei de kiba la ai jingkren ha kane ka sngi ki long u bah T. Shangdiar, Myntri shnong ka Photjaud War bad u bah S. Sangriang napoh ka ophis DLSA uba la pynïaid bad ai jingkren khublei.