Khliehriat, K’lyngkot, 30: Ka ophis jong ka District Tuberculosis Officer, Jaiñtia Hills ha ryngkat ka jingiatreilang bad ka tnat CSR jong ka company Star Cement Lumshnong, mynta ka sngi ka la pynlong ïa ka prokram ha Khliehriat CHC ha kaba la sam ïa ki jingbam tei met sha kito ki briew kiba don ka jingpang Tuberculosis, kane ka long halor ka jingbuh thong ban pyndep ïa ka prokram Pradhan Mantri TB Mukt Bharat Abhiyan (PMTBMBA), ka tnat CSR jong ka company Star Cement Lumshnong ka la nohsyniang da kaba san ei ia ki jingbam tei met sha kiba don ka jingpang TB.
Ka District Tuberculosis Officer, Jaiñtia Hills, ka Dr. E.B.V Laloo, ka la ai ki jingbatai ïa kiba bun jait ki rukom ba ki nongpang TB ki hap ban leh ha ïing khnang ban lait na ka jingsaphriang u khniang jingpang Tuberculosis, ka kyntu ïa ki nongpang ba ki dei ruh ban long shimkhia ban dih dawai tista kumba la batai da ki briew ka koit ka khiah kiba ai jingsumar ïa ki
Ka la batai bad pynshai ruh halor ki jait skim kiba long ki lad ai jingiarap ïa kiba pang TB bad ba iarap ruh da ka pisa ïa kito kiba pang TB kiba dang don hapdeng ka jingshah sumar, kumjuh ruh ka lad jingiarap kaba na ka Nikshay Poshan Yojana Scheme kaba ai jingiarap da ka pisa T 500 tyngka shi bnai na ka bynta kito kiba register bad kane ka skim.
Ka la ai ruh ka jingkhublei ïa ka tnat CSR jong ka company Star Cement Lumshnong kaba la la kloi ban ai ka jingatreilang, kaba la wan shakhmat ban sam ei ia ki jingbam tei met sha ki nongpang TB, ka kyntu ruh ïa baroh kiba ha ka imlang ka sahlang ban kin ai ka jingiatreilang ban rat dyngkhong ïa ka jingpang TB.
U Manager-CSR, Star Cement Limited, Lumshnong, u Kingshok K. Borah, u la pynpaw ka jingsngew kmen haba u iohi ba ka la don ka jinghiar ha ka jingdon kiba pang TB hapoh ka District , u la ong ruh ba ka Star Cement Company kan theh ki lad ai jingiarap katba lah sha kito kiba pang TB ban kyrsha lem ïa ki.
Kiwei pat kiba la ai jingkren ki kynthup u Medical Officer in-charge Khliehriat CHC, u Dr. Iohbor Rymbai bad u Treatment Supervisor (STS), u bah Linus Manner.
Ki jingbam kiba la sam sha kiba pang TB ki kynthup u khaw, ka umphniang, ka pylleng bad kiwei kiwei ki jait jingbam, ha kane ka prokram ki la poi 43 ngut kiba don ka jingpang TB kiba dang don hapdeng ka jingshah sumar.
