Jowai, K’Lyngkot 30: Kum shibynta ban wanrah ïa ka shongsuk shongsaiñ bad ïada ïa ki riew kynthei na ka jingshah lehbeiñ, ka Jaiñtia Hills Development Society (JHDS) rynkat bad ka jingïatreilang bad ka ophis jong ka District Social Welfare Officer West Jaiñtia Hills, kila pynlong ïa ka prakram ai jinghikai ba shisngi halor ka phang ban ïada ïa ki Kynthei na ka jingshah lehbieñ lane Prevention of Women from Domestic Violence.
Ïa kane ka prokram la pynlong ha ka Shnong Lumtrep Nongjngi West Jaiñtia Hills District mynta ka sngi 30 tarik u Kyllalyngkot, 2024.
Ha kane ka prokram la ïashim bynta da ki 63 ngut ki longkmie kynthup katto katne ki longkpa kiba na katei ka Shnong. Ïa ka prokram la pynïaid da u Field Program Associate ka JHDS u ma Francis Langlein ha ka jingïadonlang u Coordinator ka JHDS u Bah Denis Kurkalang bad kiwei de ki Ophisar Sorkar.
La ïoh ïa ki jingai jingkren bad jingpynshai halor katei ka phang na ki katto katne ki Ophisar jong ka tnat bapher bapher kiba kynthup ïa u Coordinator ka JHDS u Bah Denis Kurkalang, U District Child Protection Officer u ma. S. Passah, ka Center Manager cum Protection Officer jong ka One-stop Center ka kong Lucy Ksoo, u Officer In-charge Nartiang police Station u ma D. Lamare, ka Officer In-charge jong ka Women Police Station Jowai ka kong Ibashisha Kharpran bad ka kong D. Suchiang , Advocate District Legal Service Authority, kiba la batai shai halor ki lad ki lynti bad khanglad ïa ka jingkyrei kine ki kam sniew bad ruh ïa ki lad ki lynti ba lah ban ïoh jingïarap na kitei ki Ophis sorkar bala kdew haneng.
Haba kut jong katei ka prokram la ïoh ruh ïa ka drama lyngkot halor katei ka phang ïa kaba la shim bynta da ki Intern Student ka Martin Luther Christian University.
