Nongkasen, K’lyngkot, 30: Namar ka jingleh buit tuh ha ka jingïakop khwai dohkha ha ki bnai ba la dep uwei u rangbah uba la tip kyrteng kum u bah Aibor Wahlang uba dei na ka shnong Mawliwai u la shah khot hajir ha ka janmiet Lah Sngi u Blei ha ki nongïalam jong ka kynhun pahara shnong Nongkasen Eastern West Khasi Hills.
U Bah L.Nongrum nongaibuit ka kynhun pahra shnong haba ïakren bad u nongthohkhubor hadien ba ki la dep tohkit ïa utei u rangbah u la ong ba hadien ba ki nongpynïaid jong ka jingïakop khwai dohkha ki la lap ba uba ïoh ïa ka khusnam ba nyngkong ha katei ka jingïakop khwai u la shu leh tuh kumta hadien katto katne sngi ki la ïoh jingtip ba utei u briew u la jop da kaba shu leh buit tuh kumta ki la buddien bad ïoh kem ïa u.
Kumta ki la pynlong ka jingtohkit kaba jur ha kaba utei uba leh buittuh u la kam ba u dei na ka shnong Nongkasen. Kane ka jingjia ka la saphriang sted bha ha ki rynsan social media kumta ki nongshong shnong bad ki rawon na ka shnong Nongkasen hadien ba ki la ïohi ki la lyngoh bad bitar lep namar ki tip ba ym ju don kum utei u briew hapoh ka shnong. Dei halor katei ka nongrim ba ki nongïalam jong ka kynhun pahara shnong ka la khot hajir ïa utei u rangbah.
Utei u nongaibuit ka kynhun pahara shnong u la ong ruh ba ka jingkhot hajir ïa u ka dei namar ba kjat shaba ki leit ki wan ki lok ki jor bad ki para rawon ki ju kylli bad kynnoh ba ki nongkasen ki dei kiba leh buituh ha manla ki jingïakop khwai dohkha kumta ka la pynlehraiñ bad pynbitar ïa ki.
U la ong ruh ba ha katei ka jingkhot hajir utei u rangbah u la pan map bad u la kular ba un ym leh shuh ïa katei ka jait kam.
U la ong ruh ba lada kino kino ki briew kiba leh ïa kino kino ki kam sniew bad ki shah kem lada kim dei ban kam klumar ne pynbud nam ïa ka shnong ka thaw jong ki lada ki dei ki nong shong shnong na kiwei pat ki shnong bad lada don iba kam klumar bad pynbud nam ka kynhun pahra shnong bad ka Dorbar Shnong kin leh da kaba tyngeh bad kin ujor sha ki bor jong ka aiñ.
