Kumba 500 snem antad la rep ïa u Soh Ñiamtra ba thiang ha ka shnong Narwan

Khliehriat, K’lyngkot, 30: Ka Narwan Multipurpose Co-operative Society Ltd (NMCS) ha ka sngi Baar ka la pynpawnam ïa ka jingthiang jong u Soh Ñiamtra lyngba ka tamasa kaba la tip kum ka “Orange Festival” kaba la sdang ha kane ka sngi bad ban sa pynkut lashai ka sngi Balang.
U Myntri ka tnat Jngohkai Pyrthei ka Sorkar Jylla Bah Paul Lyngdoh uba la long kum u kongsan ha kane ka sngi plie ïa kane ka tamasa, u la noh synñiang T. 5 lak, katba ka MLA jong ka Sutnga-Saipung Constituency ka Kong Santa Mary Shylla kaba la long kum ka Symbud Kongsan ka la noh synñiang T. 3 lak sha ka Narwan Multipurpose Co-operative Society Ltd, ba kan nang lah ban kyntiew shuh shuh ïa ka kam rep Soh Ñiamtra hapoh ka shnong.
Haba kren kum u kongsan, u Bah Paul Lyngdoh u la ai mynsiem da kaba ong, “ki kti ki dei ban trei ban ktah ban rep bad ban leh bha, ki kjat ki dei ban ïaid bad jam shakhmat kum ka jylla bad kum ka jaitbynriew, ki dohnud ki dei ban dap da ka mynsiem ban kwah ban leh eiei lang na ka bynta ka imlang ka sahlang. Lada ngi kynthup lang ïa kine baroh , kaei ka ban nym lah ban long? Nga pyntikna ruh ba kane ka tamasa Soh Ñiamtra ha u snem ban wan ngin nang leh bha shuh shuh. Ngin khot ïa kiba nabar ruh ban wan sha ka tamasa Soh Ñiamtra.”
“Ka ri jong ngi ka dei ka ri kaba la kyrkhu kyrpang da u Blei naduh ka jingdon ki lum, ki wah, ki krem, ki jait mar rep ba paka bad shibun kiei kiei kiba bha kiba la ai sngewbha u Blei,” u la ong bad bynrap, “u Soh Ñiamtra na Riwar u la poi shaduh ki ri Middle East ma ngi lei ha kane ka spah snem kaba 21 balei ngim lah lada ngi ïa don ka mynsiem jong ka jingïatrei lang ryngkat, ka mynsiem ban trei shitom bad khamtam ka jingkyrshan na ka Sorkar.”
U la pynpaw ka jingsngewkmen ba palat mar shiteng na ki nongshnng shnong hapoh ka shnong Narwan ki dei kiba im da kaba rep Soh Ñiamtra.
Ka Kong Santa Mary Shylla haba kren kum ka Symbud Kongsan ka la pynpaw hakhmat u Bah Paul Lyngdoh ba un ïarap lem na ka bynta ka jingdonkam ban don ki lynti ïaid kjat ban poi sha ka kshaid kaba itynnad kaba don ha ka shnong Narwan khnang ban kyntiew ïa ka kam jngoh kai pyrthei ha kane ka thaiñ.
Ka la kyrpad ïa u Myntri ba un leit jngoh hi da lade ïa ka jaka ba itynnad bad ban ïarap lem na ka tnat Jngohkai Pyrthei ban kyntiew ïa ka jaka ba don ka kshaid.
Ka la ïathuh ruh ba ka shnong Narwan ka dei ka shnong kaba kyrpang hapoh ka East Jaiñtia Hills District kaba la ïoh ruh ïa ka nam kum ka Model Village bad ka dei ruh ka shnong kaba pawnam bha ha ka jingdon u Soh Ñiamtra.
Ka Kong Rose Mary Shadap ka nongshong shnong jong ka shnong Narwan ka la ïathuh ba ka jingthmu bad ka thong kaba hakmat eh jong kane ka tamasa Soh Ñiamtra ka long ban pynpawnam ïa u Soh Ñiamtra uba don ha shnong, ym tang hapoh ka jylla hynrei sha kiwei kiwei ki jylla bad wat shaduh ki ri jong ka pyrthei ruh.
“Ngin shym la lah ban pyntikna ha kino ki snem la sdang ban thung bad rep ïa u Soh Ñiamtra ha ka shnong Narwan, hynrei da kaba twad jingmut bad da kaba buddien na ki riewtymmen ngi la lah ban sngewthuh ba u Soh Ñiamtra u la don ha kane ka shnong Narwan ym duna shuh ïa ka San Spah snem kaba mut naduh ki por ki mynbarim jong ngi kiba la mih na Shangpung bad wan seng shnong ha kane ka shnong,” ka la ong.
“Kat haduh u Nohprah 2023 ka shnong jong ngi ka don 720 tylli ki longïing bad na kine kiba thung ne rep Soh Ñiamtra kim duna shuh ïa ka 400 ïing, kaba mut ba palat mar shiteng ki nongshong shnong ki dei kiba rep bad thung Soh Ñiamtra. Ka jingrep bun ne rep duna ïa u Soh Ñiamtra ka shong ha ka jingeh ka jaka. Ki longïing kiba don ïa ki kper ne ki jaka kiba heh te ki thung 1500 haduh 2000 tynrai ki dieng soh bad kiba don ki kper ba rit ki thung 50-70 hapoh ka 100 tylli ki tynrai ki dieng soh,” ka la ong.
“Ka jinglong ba kyrpang jong u Soh Ñiamtra jong ngi ka long ba u don ka jingmad kaba thiang bad ba shngiam bad ngi lah ruh ban dang ïoh kheit ïa u soh haduh u bnai Lber manla u snem,” la ong ka Kong Shadap.
Ka la ïathuh ruh lyngba ka jingprat lynti jong ka Meghalaya Basin Management Agency (MBDA) ha ki khyndiat taiew, ki nongrep ki la lah ban pynpoi ïa u Soh Ñiamtra na ka shnong Narwan shaduh sha Dubai bad sha Bengaluru, watla ka dei tang ka jingsdang. “Nga sngew ban ong ba ka dei pat ka jingsngew sarong jong ngi kum ki nongshong shnong,” ka la bynrap.