Shillong, K’Lyngkot, 30: Ki shipai BSF kiba la ïoh jingtip na ki tnat syntiat ki la pynlong ïa ka jingap ktem bad ïoh kurup ïa ka jingpyrshang ki snar nongkhaii ban shalan be-aiñ ïa ka dawai Phensedyl bad ka shini na khappud sha ka ri Bangladesh.
Ïa kine ki mar khaii tuh, ki shipai BSF Meghalaya ki la ïoh kurup hynnin ka Lah Sngi u Blei.
Ha kane ka jingkurup, ki shipai BSF jong ka 172 Battalion ki la ïoh kurup 190 bilor ka dawai Phensedyl katba ki snar khaii tuh ki dang pyrshang ban shalan be-aiñ sha Bangladesh lyngba ka khappud jong ka East Jaiñtia Hills, Meghalaya.
Ha kawei pat ka jingkhynra, ki shipai BSF da ka jingïatreilang bad ki Pulit ka Meghalaya ki la ïoh kurup 18,000 kilo ka shini na ki bynta bapher bapher ka khappud jong ka Jylla Meghalaya.
Ïa kine ki mar khaii tuh la aiti noh sha ka ophis Customs bad sha ki Pulit ban leh katkum ki kyndon jong ka aiñ.
