Shillong, K’Lyngkot, 30: Ka tnat Pulit jong ka East Khasi Hills ha ka sngi Baar ka la maham ïa ki nongshong shnong ba kim dei ban ngop ha kino kino ki jingshah pynbiej ha ka jingpynap shrip da ki riew shukor kiba ju mlien ban phah ïa ki ‘Link’ ba kular ban ïoh pisa puk puk tang hapoh khyndiat por.
Ha u kyrwoh, u Superintendent of Police, (City) East Khasi Hills Bah Vivek Syiem u la ong, “la lap ba ka don ka jingpynsaphriang ha ka jylla kaba leh da ki nongshukor ba kular ban siew pisa noh marmar da kaba khñiot ha kawei ka rynsan kaba la tip kyrteng “Numgenious AI” kaba don ïa ka “Link” https://numgenius-ai.vsisk.com. Ki riewshukor, ki pynngop ïa ki nongshong shnong ba luilui, da kaba siew pisa noh marmar ban ïoh ïa ka jingshaniah tang hadien katto katne por ba la thep ïa ka pisa. Kiba bun kum kine ki jingjia la ïoh jingtip ba ki la jia ha ki bynta bapher bapher jong ka East Khasi Hills district ha ki taiew ba la leitnoh bad ka jingtohkit ka dang ïaid shakhmat ban ïoh kem ïa ki nongshukor lyngba ki kor “Online.”
U SP, u la ïathuh ba ka jingpynngop ka long lyngba ka Whatsapp ha kaba ki briew ki pyntip sha ki paralok ban rung sha kine ki jingïakynshew pisa khnang ba kin ïoh pisa puk puk tang hapoh khyndiat sngi. Ka jingsiew pisa ka long manla ka kynta, manla ka sngi, manla ka taiew bad manla u bnai bad kiwei kiwei ki skhim kiba kam ban pynkharoi ïa ki nongthep pisa khnang ba ki nongthep kin ïoh ïoh jingmyntoi katba ki nang lah ban pynrung briew.
“Tang shu siew ïa ka pisa sha ki riewshukor, phin ym ïoh jingtip eiei shuh na ki nongshukor. Ki nongshukor ki lah ban kylliang ïa ka kyrteng bad ïa ka Link ban ïoh pynap shrip shuh shuh sa ïa kiwei pat,” la ong u SP.
U SP u la kyntu ïa ki paidbah lada ki ïoh kum kine ki jingpyntip kiba ishan khmat ki lah ban leit ujor sha ki thanat kiba don hajan. Ki paidbah ki lah ban ujor lyngba u Cybercrime Helpline Number 1930 bad sha ka Police Control Room, Shillong lyngba u nombar 0364-2215427 ne 6009196479 na ka bynta ki jingïarap.
