Nongstoiñ, Jymmang 04 : Namar ka jing kiew sted jong ka jingnang jingtip ban shna ïa ki kali kiba laiphew jait bad ka jingpoi jong ki surok ha man la ki kyndong kynshrot ka la pynlong ïa ki paitbah ba kin klet noh ban pyndon kam da ki kulai ha kaba kit jingkit ne ban leit jingleit sha ki jaka ba kham jngai. Wat la katta ruh ki dang don ha ki katto katne ki jaka bad ki shnong ba ki khynnah bad ki samla ki dang sngewtynnad ban shong kulai haba ki leit jingleit la sha jan ne sha jngai ruh kumjuh.
U bah Naraïansingh Lyngkhoi u khynnah samla na ki thaiñ Byrki West Khasi hills haba ïakren bad u nongthohkhubor u la ong ba ha ka thaiñ jong ki ki dang don shibun ki khynnah samla kiba sngewtynnad ban shong kulai bad u la ong ruh ba teng teng ki ju ïakynduh lang bad haba ki lait por ki ju rah lang ïa ki kulai jong ki bad ki ju leit ruh ha ki pyntha phlang ban pyniamareh bad ïakop u kulai jongno uba kham khlaiñ ban mareh .Nalor kata u la ong ruh ba wat la ki pynmareh thong ruh kim ju kamai pisa hynrei ki shu pynmareh tang ban ïa tynjuh bor para lok.
U la ong ruh ba ki para samla jong u kiba don ïa ki kulai kiba khlaiñ ban mareh ki sngew bang bha. Utei u samla u la ong ruh ba baroh ki paralok jong u kiba sngewtynnad ban shong kulai ki kwah bad angnud ban pynkhie im biang ïa ka kam shong kulai bad ba ka sorkar kan pynlong ïa ka kam shong kulai kum kawei na ki jingïalehkai sport kaba kham kyrpang namar lada ka sorkar ka la ithuh ïa ka kam shong kulai kum kawei na ki jingïalehkai sport ka lah ban ïaryngkat kyrdan bad ka jingïalehkai phutbol.
Ha kajuh ka por u la ong ba lada ka sorkar ka kwah shisha ban kyntiew ïa ki kam ïalehkai sport ka la dei ban phai khmat sha ka kam shong kulai ruh bad ba kan lum lang ïabaroh ki ba don kulai napoh ka district bad ban pynlong da ka tamasa shisien ne arsien shi snem namar ha kine sngi ki dang don shibun bha ki kulai ha West Khasi hills.
