Ba jop kput ka BJP ha Assam bad West Bengal ai khublei u CM ïa u PM, HM bad Himanta

Shillong, Jymmang 4 : U Myntri Rangbah ka Jylla u Conrad K Sangma ha ka sngi Nyngkong, ula ai khublei ïa u Myntri Rangbah Duh u Narendra Modi, u Myntri kam Pohiing u Amit Shah bad Myntri Rangbah ka Assam u Himanta Biswa Sarma halor ka jingleh bha ka BJP ha ka elekshon ha Assam bad West Bengal, haba ñiew kum ka “jingjop kput” bad ka jingpyni ïa ka jingshaniah u paidbah.
Ha ki jingthoh ba ula thoh ha X, u Conrad nyngkong eh ula ai khublei ïa u Myntri Rangbah Duh ka Ri.
“Khublei ïa u PM ba don burom, @narendramodi ji halor ka jingjop kaba khraw jong ka party ha Assam bad West Bengal” ula thoh.
“Kane ka jingai rai kaba sngewtynnad ka pyni ïa ka jingshaniah jong ki paidbah ha ka jinglong nongïalam ba ïohi jngai bad ka jingaiti sha ka roi ka par, ka jingkiew shaphrang bad ka synshar khadar kaba bha”.
Ula ai khublei ruh ïa u Myntri kam Pohïing ka Ri u Amit Shah. “Khublei ïa u Myntri kam Pohïing ba don burom, Shri @AmitShah ji bad ïa ka party jong u namar ka jingïoh ïa ka jingkyrshan kaba khlaiñ na ki paidbah ïa ka jingaiti jong ki sha ka roi ka par ha Assam bad West Bengal” ong u Conrad.
Haba thoh sha u Myntri Rangbah ka Assam u Himanta Biswa Sarma, u Myntri Rangbah ka Meghalaya ula ong “Khublei ïa u hynmen jong nga, Shri @himantabiswa namar ka jinglah ban lehbha ka party jong u bad sa shisien ban ïoh biang ïa ka jingshaniah bad ka jingkyrshan jong ki paidbah ka Assam”.
Kine ki jingthoh kila mih hadien ba ka BJP kala ïoh ban thaw Sorkar biang ha ka wat kaba lai sien lynter ha Assam bad ka jingnang kiew ha West Bengal.