Nongpoh, Nohprah, 01: U Bah Sadon Blah, President rangbah ka seng Hynniewtrep National Youth Front (HNYF) sengkmie ryngkat ki nongïalam na Ri-Bhoi District, ha ka sngi Saitjaiñ ki la hiar sha ka thaiñ Ri-Bhoi Sepngi ban pynskhem ïa 2 tylli ki Circle ryngkat ki nongïalam ba thymmai ba kynthup ïa ka Umrit Circle bad ka Jirang Circle kiban ïatreilang bad ka Patharkhmah Circle ka ban sa kyntiew pat ïa kine ki circle sha ka Western Zone.
Haba kren ha kane ka sngi hadien ka jingpynskhem ïa ki nongïalam ba thymmai jong kitei ki 2 tylli ki Circle u Bah Sadon Blah u la pynshai ïa ka nongrim jong ka seng HNYF kaba la seng naduh u snem 1996 kaba dang ieng ha ka nongrim haduh mynta kumno la shu pynkylla nong India jubor ïangi, bad kum ki nongïalam ba thymmai ki dei ban tip ïala ka thymmei.
Utei u nongïalam u la kren shai ruh ïa ka nongrim jong ka HNYF ba ka dang ïeng haduh mynta halor ka Instrument of Accession bad ka jingleh bor ka sorkar India kaba la shu iuhroit ïa ka jaitbynriew da kaba pynap da ki ktang suloi ban pynbor ban long ki nong India khlem da burom ïa ka Instrument of Accession (IoA) kaba la dep ïasoi hadien ka jingsynshar jong ki phareng.
“Ngi dei ban sngewthuh ba ka jaitbynriew hynñiewtrep kam dei ka jaitbynriew ba shah teh mraw ha ka por ba synshar ki syiem muslim hapoh ri india kam dei ka jaitbynriew kaba long nong India naduh kato ka por bad wat hadien ba synshar u phareng ruh ngi khlem ïasoh bad ka ri india, hadien bala ieh ïa ka ri india ha ki snem 1947-1948 ki khlieh nongsynshar ki la soi da ka Instrument of Accession kaba ngi ïa pdiang katkum ka dulir bad ki don 3 tylli ki kyndon ha ka Annexed Agreement ba ka sorkar India ka lah ban shna aiñ kata ka long ban pynïasoh bad ka ri india lyngba ki surok ki lynti ki syngkien, kaba ar katkum ka annexed agremment ka long ba ngi mynjur ban pyndonkam kajuh ka pisa bad ka ri India, bad kaba lai kaba ong ba lada don kano kano ka jingshah thombor ne ka jingshah lehbor, ngi mynjur ban ïatreilang bad ka sorkar India kum ka common defence.
La mynjur tang 2 snem ha ka standstill agreement, hynrei kaba sngewsih ka long ba kata ka 2 snem kat pat kut ka sorkar India ka la hiar thma ïa ngi, ka la pynap da ki tup da ki man ïa ki khlieh nongsynshar kiba ieng halor ka nongrim jong ka Instrument of Accession bad ïangi la pynlong nong India jubor da ka jingshah byrngem byrsit la ong u Bah Sadon.
Kum ka seng haduh mynta ka dang ïeng ha ka nongrim jong ka IoA ba dei ban khyllie biang ïa ka dulir bad lada dei ban ïasoh bad ka ri India ruh dei ban pynïasoh da ka jingsngewthuh jingmut ym ban shu pynbor, u la bynrap.
Ha kane ka sngi pynskhem ïa kine ki Circle thymmai nalor u Bah Sadon Blah la don lang ruh da u President ka Ri-Bhoi District u Bah Hesting Lyngdoh, u Bah Barnabas Manih Vice presidentseng kmie, u Robin Umbah Finance Secretary, bad ha ryngkat ki nong ïalam ka Patharkhmah Circle bad ki dkhot ki nongïalam ba thymmai jong ki ar tylli ki Circle.
