Ngi dei ban buh ka thong ban wanrah ka lawei ba phyrnai jong ka jylla haba jied ïa ki nonmihkhmat

Nongpoh, Rymphang 19: Kum ki nongshong shnong ngi dei ban kloi ban rai ban jied ïa ki kyrtong kiba ngi ikop ban long ki nongïalam kiba lah ban shakri ïa ki paidbah, ngim dei ban jied hadien ba ngi la shah thied, bun na ngi, ngi ong ngan thep vote ïa uba pynsiew bai kot skul, don pat kiba ong ngan thep vote ïa uba ïarap ïa nga ban shna iing, don kiba ong ngan thep vote ïa uba ïarap ban siew bai hospital bad kumta ter ter, baroh kine ki long ki jingmyntoi shimet.
Ngi dei ban buh jingkylli lada baroh ngin thep vote na ka bynta ka jingmyntoi shimet, mano ban thep vote ban ioh ki surok kiba bha, mano ban thep vote ban ioh ïa ki skul bad college kiba bha, mano ban thep vote ban ioh ïa ka synshar khadar kaba khuid, ngi dei ban pyrkhat na ka bynta ka jingmyntoilang namar ba bunsien ngi don ka jingsngewthuh bakla, don kiba ong lada nga kyrshan ïa u uwei u kyrtong ngam donkam shuh ban bylla, don pat kiba ong lada ngan kyrshan ïa uwei pat ngam donkam shuh ban leh ïa kine ki kam kiba jynjar mynta, hynrei kaei kaba ngi dei ban leh man ka sngi lada jop uno uno ruh ngi dei hi ban leh.
U ba rep kba u dei hi ban rep kba, uba bylla u dei hi ban bylla, uba hikai skul u dei hi ban hikai skul, te hynrei lyngba u nongmihkhmat uba ngi jied pat ngi wanrah ïa ka roi ka par kaba ktah lang ïa ngi baroh kum ka imlang ka sahlang bad ka jingkylla ka dei ban wan ha ngi shimet shimet, ka jingpynthame lyngba ka pisa, lyngba ka jingpyndih buaid, lyngba jingpynleit excursion, lyngba ka jingpynleit bam khana bad kumta ter ter ki pynthame ïa ngi, ngi kloi ne em ban ong ba ngam dei ban shah pynthame, ngi kloi ne em ban ong ba ngam dei ban shah pynbiej, ngi kloi ne em ban ong ha ki khun ki kti rai bad jied ïa u kyrtong, u briew uba sngewthuh bad uba kloi ban shakri, jied ïa u briew uba lah ban long kum u nongïalam (leader) namar ngi donkam ïa ki nongthaw aiñ hapoh iingdorbar (Assembly) kiba don ka sur ban kren bad ïa said na ka bynta ki paitbah, ym ïa ki mahajon, heh spah businessmen ban ïa bate pynïaid kam hapoh iingdorbar, dei ma ngi ki ban rai ngi kloi ne em ban wanrah ïa kata jingkylla da kaba sdang na lade shimet.