Jowai, Rymphang 19: Shi bynta ban pynsngewthuh ïa ki paidbah halor ka jingkordor jong ka jingthep Vote kum u nongshong shnong bad jingdonkam ban jied ïa ki nongmihkhmat kiba trei bah na ka bynta ki paidbah ban wanrah ïa ka roi ka por jong ka shnong ka thaw ka jylla bad ka Ri hi baroh kawei.
Mynta ka sngi siatjaiñ kawei na ka kynhun treimon sngewbha kaba la mih ha ka kyrteng jong ka “Movement for Change” ban ïalap shaphang ka Election kala pynlong ïa ka prokram pynsngewthup paidbah ha Madan Moosaphir Iawmusiang Jowai (Stand Ummulong).
Ïa ka jingïalang la pynïaid da u ma T. Samayan ha kaba la ïoh ka jingkren kiba kynthup na u ma Rastingwell Thabah, uba la ong kane ka prokram kaba long shi bynta na ka jingthmu ban pynshai paidbah shaphang kino ki kyrtong kiba dei ban jied ha kane ka kynti.
Ula ai jingïaroh ruh ïa ki Dorbar Shnong bapher bapher kiba la pynlong da ki ‘Common Platform’ lyngba kine ki rynsan ki kyrtong kin ïoh lad ban pynshai sha ki paidbah nongshong shnong ïa ki thong treikam jong ki hadien ka jingjop jong ki ïa ka Election.
Shuh shuh ula ong kine ki National Party baroh haba peit ïa ki mat treikam (Manifesto) jong ki ki long tang ka pynbeit suda da ki jingbam khynnah bad ki bym don ïa kata ka nongrim ba skhem ba peit ïa ka jingeh jong ka Jylla hi baroh kawei.
Kiwei de kiba ai jingkren ki long ma Firmly Ryngkhlem, ma Pailakordor Lyngkot, ma Thomas Passah bad ma Chandame Sungoh baroh ki kine ki nongkren kila pynsngew ba ka ri India kala pynkup bor ha manla u wei pa uwei u nongshong ka Ri u dei ban pyndep hok ban leit thep vote bad ban jied da ki nongmihkhmat kiba trei na ka bynta ki paidbah ym kiba khwan myntoi shimet.
