Da ki hajar poi ki paidbah sha ka jingïalang u Bah Nehlang ha shnong Sohkymphor

0

Khliehriat, Rymphang 19 : Da ki hajar ngut ki nongkyrshan jong u kyrtong ka NPP, u bah Nehlang Lyngdoh, ki la ïa poi sha ka lympung jingïalang ba la pynlong myn ha ka 17 tarik ha shnong Sohkymphor, na ka liang utei u kyrtong NPP na ka 6- Khliehriat Constituency u la pan ka jingkyrshan na ki paidbah ban ailad ïa u ba un poi biang sha ka thong ha kane ka MLA election bad kular ba un bteng biang ïa ki kam ban shakri ïa ki paidbah ban wanrah ïa ki lad jingïarap ki ban long ka jingmyntoi ïa ki paidbah.
Haba kren ha ka jingialang, u bah Nehlang Lyngdoh u la ong ba ha kito ki por ba u dang long u MLA ka thaiñ u la lah ban pynioh surok haduh 108 kilo mitar kata naduh Ladrymbai shaduh Borghat kaba 48 kilo mitar, na Borghat shaduh Sonapur kaba 60 kilo mitar kumjuh ruh naduh Malidor shaduh Sohshrieh haduh 94 kilo mitar, ym tang katta u la pynioh ruh ki lad jingïarap da ki tin sop ïing ïa ki paidbah ka constituency, u la pan ka jingkyrshan ba ha kane ka election ruh ba un jop namar mynta ki la nang ïai don shuh shuh shibun ki skim kiba heh ki ban long ka jingmyntoi ïa ki paidbah.
U la kular ruh ba un kyntiew shuh shuh ïa ka kam jngohkai pyrthei (tourism) kumjuh ruh ban pyn ïoh shuh shuh ki surok ha kito ki jaka bym pat don surok.
Na ka liang u bah Kitborlang Rymbai, uba dei uwei na ki nongkyrshan jong u bah Nehlang Lyngdoh, haba kren ha ka jingïalang u la ong ka East Jaiñtia Hills District ka dei kaba riewspah ha ka jingdon ki mar pohkyndew kum u dewïong, u maw rasong bad kiwei kiwei bad u mah Nehlang ruh um shym la shong kli kti hynrei u bud dien beit ïa kane ka kam dewïong bad ong ruh ba mynta ka kam dewïong ka don jingkyrmen ba ki briew kin ïoh ban trei dewïong biang kumba ju trei mynshwa, kawei kaba u ba Kitborlang, u la kyntu ïa ki paidbah, u la ong ba lada ïoh biang ka lad ban tih dewïong, ym dei ba ïa leh shongshit, ym dei ba leh lut phut kai ïa ka pisa hynrei dei ban long kiba stad, dei ban pyndonkam bha ïa ka pisa ha kaba seng kam, namar bun ki samla ki bym donkam don jam bad ki don haduh kumba 10000 ngut ki samla wad kam kiba la registrer kyrteng hapoh ka tnat Employment Exchange ki bym pat ïoh kam haduh mynta , u la bynrap ruh da kaba ong “Balei ngi kyrduh kam, kane ka pyni ba don ki briew kiba shong ha Secretariat ki bym ïohi jngai, ki bym pyrkhat ïa ki paidbah kiba pyrkhat tang ban biang shimet, u ma Nehlang u dei uba kloi ban ai san snem ka tulop jong u sha ki khynnah skul, katno tam lada ai ïa u ka lad ban ioh ban ïarap ïa ki 10000 ngut ki bym iohkam hapoh ka district”.Kumjuh ruh u la pashat ïa ka jingmad jingeh ki paidbah naduh u snem 2014 ba shah khang ïa u dewïong bad u pynkynmaw ruh ïa ka jingshah siat iap ha Mookhep ha ki kuli jong ka sorkar, u pynpaw ka jingsngew nguh ïa u bah Nehlang ba mynta u dang pynkhreh ba un wanrah biang ïa ka pliang ja jong ki paidbah kaba la shu shah knieh jyndat.
Kumjuh ruh u bah Sambormi Lyngdoh, u kyntu ïa ki paidbah ba kin pyrkhat bha haba thep ïa ki vote jong ki khamtam kito ki samla kiba dang ïoh ban thep vote nyngkong, namar ka shi vote jong ki ka lah ban wanrah ïa ka jingkylla, u kyntu ïa ki paidbah ba kin thep ha u bah Nehlang Lyngdoh “Ngi donkam ïa ki briew kiba lah ban wanrah ïa ka roi ka kiew, kiba lah ban wanrah ki jingmyntoi ïa ki paidbah, u bah Nehlang Lyngdoh, um dei u kyrtong uba dang thymmai, hynrei u la long teng u MLA bad u myntri sorkar, ha ka por ba u dang long kum u myntri sorkar, tang hapoh ar snem u la wanrah ïa ka East Jaiñtia Hills District, hynrei u kyrmen pat, san snem aiu u la leh na ka bynta kane ka district? ngi ïohi ruh ba bun ki khynnah samla, ki hap ban leit trei, leit pule sahbar jylla”
“Nga buh ruh ka jingkylli, ba kaei kaba u la leh halor uto u maw nongrim ba la dep plie naduh u snem 2018, na ka bynta ban wanrah ïa ki Residential school hapoh ka district, kaei ba u la leh bad ki Residential school, bad ka Teacher Training Centre kaba don hapoh ka district, ha kaba ha ka por jong u ma Justine Dkhar u la lah ban pyndep ïa ka jingtei (building), kaba sngewsih ruh ba wat tang ka bill jong ki contractor ruh ym pat ïoh, u la long u myntri sorkar, ha ka jingshisha ki jingkyrkhu ki la dei ban hap kumba hap slap hapoh ka district, hynrei sngewsih ba san snem ki shu tykhong” ong u bah Sambormi.
Kiba la ai jingkren ha kane ka jingïalang ki kynthup ruh u Dr Emanuel Dkhar, na Rymbai, u MDC Dr Sanky Shangpung, MDC u bah Phasmon Dkhar, u bah Miky Lyngdoh, na Tuber, u bah Augustine Kyndiat, na Moolamanoh bad kiwei kiwei.

Leave A Reply

Your email address will not be published.