Ngi bunkam ban her Delhi ban leit wad skhim pynroi ym don por ban ïa sngap ïa ki jingkynnoh ki Liang Pyrshah : Bah Prestone

Shillong, K’lyngkot 17 : U Symbud Myntri Rangbah ka jylla uba peit ïa ka tnad Kam Pohïing bad PWD U Bah Prestone Tynsong mynta ka sngi Thohdieng, ula ong ba ka Sorkar MDA ba la ïalam da ka NPP ka bunkam ban her Delhi ban leit wad bad kyrpad ban ïoh bun ki skhim pynroi pynpar ha ka jylla namar haba ka jylla ka roi ka par ka jingmyntoi ka long ïa ki paid nongshong shnong. Kam pher lada hap ban rah bol ne hap ban nguh ban dem ha Delhi ruh namar ngi leh ïa kane na ka bynta ka jingmyntoi u paidbah bad kumta ym don por ban pynlut kai ha kaban jubab ïa ki jingkynnoh, jingkynthoh ba khlem nongrim ki Liang Pyrshah.
Haba jubab ïa ka jingkylli halor ka jingpynkhreh ka NPP ïa ka elekshon MDC ha KHADC bad JHADC, u Bah Prestone ula ong “Ngam ïohi satia ba kine ki jingkynnoh ba khlem nongrim jong ki Liang Pyrshah kan ktah ïa ka party ha kane ka elekshon”.
Kat kum ka jingong jong u, kane kam dei shuh kaba thymmai ba ki seng saiñ pyrthei ba don ha ka Liang Pyrshah ki ju leh naduh mynshwa haduh mynta ki ïai kynnoh beit ïa ki party ba don ha ka sorkar. Kumta ruh ha kane ka kynti ruh namar ka NPP ka ïalam ïa ka sorkar MDA kin mih beit ki jingkynnoh ba laiphew jait .Kita ki jingkynnoh bamsap lei kiba hakhmat eh tangba ka dei ka jingkynnoh ba khlem nongrim namar lada kynnoh bamsap ai ruh bad ki jingpynshisha hynrei tang ban ïoh kynnoh ha ki ka la biang.
“La ka dei ka VPP ne kano kano ka party, ka dei ka kamram jong ki ban ong ïa kata. Wat ma nga lada nga don ha ka Liang Pyrshah, nga hap ban ong ba kane ka Sorkar ka dei kaba bamsap bad kumne kumtai lym kumta phin shu jah kyrteng hi dalade. Phi ïoh ïa kaei kaba nga mut. Kumta, ngan ym pynlut por halor kine kiei kiei namar haba kut, nga ong ha phi ba kaba biang eh ban peit kan long ha ka 24 tarik Rymphang, ka sngi ñiew ïa ki vote bad hangne phin sa sngewthuh” ong u Bah Prestone.
Haba kylli, u Symbud Myntri Rangbah ula ong “Kaei kata ka mat isih Sorkar kaba phi ïakren?. Nga dang shu jer kyrteng ïa ki project ba la pyntreikam da mano? T.5000 klur tam nga tharai kam dei ka kamkai bad lada phi ïakren ïa ka T.15000 klur ruh jong ka surok Express Corridor, phi lah ban pyrkhat ïa kane ba ka Meghalaya, ka Jylla kaba rit, ngi ïoh haduh katne ki project bad ki skhim. Balei ngi ïoh? Ka dei namar ka Sorkar ka dei kaba treikam. Ngi la lah ban pynkohnguh ïa ka Sorkar India, na kata ka daw ngi la ïoh ïa kine ki kam pynroi”.
“Ngim pynlut por hangne ban kren ba utei uba long kumta, utei uba long kumtei, ngim don por ban leh ïa kata. Ngi don por tang ban leit sha Delhi wat lada hap rah bowl bad kyrpad ban sngewbha ban ai ïa ngi la ka long kumno kumno ruh. Lada ngi dei ban nguh ïa ki khlieh jong ngi ruh, ngi hap ban leh namar jong no? na ka bynta ka jingmyntoi ki paidbah ka Jylla. Ta ka daw ngam don por ban ïakren halor kiwei ki seng saiñ pyrthei lane ïano ïano ruh hynrei ngi la duh thiah duh dem ba kumno ngin lah wanrah kham bun ki project, kham bun ki skhim sha ka Jylla jong ngi” ula ong.
Halor ka rai jong ki katto katne ki MDC ka NPP ban mih ïakhun noh kum ki kyrtong shimet, u Bah Prestone ula ong “Ngam don eiei ban ong ïa kane. Kane ka dei ka riti synshar paidbah. Phi don ïa ka hok ban leh ïa kata. Phi lah ban ïakhun kat na kaba phi kwah la ka dei ka BJP ne kino kino ki party lane kum ki kyrtong shimet naba ka riti synshar ka Ri ka shah ïa kane. Kumta ngam don eiei ban ong halor kane”.