Nongpoh, Naitung, 11: Ki Shipai ngam um jong ka SRT (F&ES) Shillong ki la ïoh ban sei noh ïa ka met jong uwei u rawon ba la tip kyrteng kum u Bah Shiningstar Kharpati na ka shnong Umpling, East Khasi Hills uba la ïap jyllop hadien ba u la leit khwai bad la ki paralok ha pung Nongmahir ha Ri-Bhoi.
Katkum ka jingtip ba la ïohlum, la ong ba kane ka la jia ha ka sngi u Blei ha ka por shiteng sngi eiei, ha kaba u Bah Shiningstar Kharpati u la leit khwai bad ar ngut ki paralok shnong ha pung Nongmahir, Ri-Bhoi District bad tang shu poi ha kane ka jaka ki la shna ïa ki iing sher dara. Namar ka jingther jong u lapbah bad ka jing paswut jong ka lyer, bad ha ka por ba ki paralok jong u ki dang bunkam ban shet bad ban pynkhreh bam, ka ïing sher dara ka la shah rah noh ha ka lyer sha pung.
Ha kum kane ka por u Bah Shiningstar Kharpati u la ryngkoh ha pung ban khawoh ïa ka iingsher dara ba la rah ka lyer bad ngam jyllop ha ka pung watla ki paralok jong u ki la pyrshang ban ïarap bad ai ruh da u siej ba un ïoh bat.
Na ka liang ki Pulit jong ka Kyrdem Kulai OP ki la pyntip ruh sha ki Pulit ngam um jong ka Search and Rescue Team, Fire and Emergency Services bad mar mar ki la hiar sha Nongmahir bad ïoh sei noh ïa ka met jong u Bah Kharpati bad pynkit noh sha Civil Hospital Nongpoh ban pyndep ïa ka post-mortem hynrei namar ka jingkyrpad jong ki bahaiing na ka liang jong u Majistor u la pyllait noh bad aiti ïa ka met sha ki bahaiing ban pyndep ïa ka jinglehñiam ba khatduh.
