Shillong, Naitung, 11: Ka Khun Hynñiewtrep National Awakening Movement (KHNAM) ka la ong ba kan sa tih bniah naduh tynrai ban lap ïa ki buit sianti jong ka Sorkar Jylla ha kaba ïadei bad ka jingpynbeit thymmai (Amendment) jong u snem 1972 bad ïa ka Roster System bad kynnoh ruh ba ka jingthung ïa ka Expert Committee ka dei tang ka buit pynslem jong ka Sorkar ban khmih biang ïa ka Reservation Policy.
“Ka jingïalang jong ki seng saiñpyrthei halor ka reservation policy kaba la long ha ka 31 tarik, Jymmang, 2023 ha Conference Room, Main Secretariat ka la shim ïa ka rai ba baroh ki seng saiñpyrthei kin phah ïa ki jingai jingmut ba shongnia ba pynksan hapoh 15 sngi. Ka KHNAM ka ladep aiti ïa ka jingai jingmut lyngba ka shithi No. KHNAM/CEC/2023-24/RP 31 tarik, Jymmang, 2023. Hynrei kaba sngewsih ban tip ka long ba katkum kaba paw ha ki lad pathai khubor ka Myntri jong ka tnat Aiñ ka ong ba ‘ym pat don satia kino kino ki seng saiñpyrthei kiba phah ïa ki jingai jingmut haduh mynta” la ong u Working President ka KHNAM u Bah Thomas Passah ha u kyrwoh ba la phah sha ki lad pathai khubor ha ka Lah Sngi U Blei.
“Kane ka long kum ka jingpynkhein ïa ka rai ba la shim ha ka jingïalang kaba la long ha ka 31 tarik, Jymmang, 2023 bad ka long ruh ka lynti ka bym dei. Ka jingpyrshang ban pynslem ïa ki mat ba kongsan jong u paidbah kam dei shuh kaba dang thymmai bad ngin ym sngewphylla. Ha ka jingïalang jong ki seng saiñpyrthei ka KHNAM, UDP, HSPDP, VPP bad ka INC ki la pynpaw ïa ka jingsngew ba ladei ban khmih bniah biang ïa ka Reservation Policy 1972 kaba la rim shaba palat, hynrei kumba ka paw namarba ïa kane ka kam la rah sha surok bad la jan baroh ki sngap jar ban ïakren ïa ki mat kiba donkam,” la ong u kyrwoh.
U Bah Passah u la ong, “ha ka jingïalang jong ki seng saiñpyrthei ngi la pynpaw ïa ka jingsheptieng ba ka Expert Committee kan sa shu long tang ka buit ban pynslem bad ka ban pynsuki ïa ka jingthmu ban khmih bniah ïa ka Reservation Policy bad kumba ka paw mynta ka jingsheptieng jong ngi ka long shisha kaba dei. Hadien palat shi bnai hadien ka 31 tarik, Jymmang, 2023, ki kam ki la ïaid suki kum ka mattah ïa kaba ngim lah satia pdiang daleilei.”
“Ngi la ïai pynpaw ïa ka jingsngewkhia ha kaba ïadei bad ka jingpyntreikam ïa ka Roster System shadien da ka Sorkar. Ha ki jingïalang ba bunsien, ka Sorkar ka la pyrshang ban ïalam bakla ïa ki seng saiñpyrthei bad ïa ki paidbah. Hynrei ha ka jingpynbna ba dang shen ïa ka result kam Pulit ba la pynbna ha ka 28 tarik, Jylliew, 2023 la ïohi ba 41.63% (420) ki Khasi-Jaiñtia ki la shah jied bad 46.18% (466) ki Garo ki la shah jied bad kane ka pynpaw ba ka result la pynbna da kaba pynshong nongrim ïa ka Roster System kaba treikam shadien. Namarkata, ngi ïaiban ba ka Office Memorandum ba thymmai kaba la pynmih ha ka 14 tarik, Jylliew, 2023 ka dei ka Roster jong ka Backlog ba la buhrieh namarba ïa ka Data la shim naduh u snem 1972 lyngba ka Roster Register,” u la bynrap.
“Katkum ka jubab RTI ba la ïoh pdiang na ka Personnel Department, Sorkar Meghalaya ha ka 5 tarik, Naitung, 2023, ngi la ïoh jingtip ba ym pat don kawei ruh ka tnat treikam kaba la pynsdang ban buh ïa ki Roster Registers. Namarkata, ka jingkylli ba shong aiñ ka ong ha kano ka rukom ka Sorkar ka lah ban pyntreikam ïa ka roster system khlem ka Roster Register. Haba kylli, hato ka Office Memorandum kaba 14 tarik, Jylliew, 2023 ka la kdew ne em ïa u bnai bad u snem ba la sdang ban pyntreikam ïa ka Roster. Kumba ka paw, ka Sorkar kam shlan satia ban jubab,” la kynthoh u Working President ka KHNAM.
