Nga rem namar ka jingshah ïalam bakla halor ka building By-Law: Ronnie
Phi jop na ka mat MUDA bad phin rem ruh da ka
Shillong, Rymphang 07: U MLA barim ka Congress na Mylliem uban aireng ruh ha kane ka elekshon ba mynta u Bah Ronnie V Lyngdoh ha ka sngi Ba-ar u la ong ba ka jingshah rem jong u ha ka elekshon ha u 2018 ha u Bah Hamlet Dohlieng ka dei namar ki paidbah ki la shah ïalam bakla halor ka aiñ shna ïing Bulding by-law jong ka Meghalaya Urban Development Authority (MUDA).
Haba kren sha ki lad pathai khubor u Bah Ronnie u la ong ba ka jingrem jong u ha u 2018 da 450 vote eiei bad tang hadien shisnem pat ha ka elekshon MDC u la tam pat ïa ka kyrtong ka ba pynïakhun da u MLA da palat 2000 vote ka dei ka dak ba ki paidbah ki la sngewthuh ba ki la shah ïalam bakla halor kane ka mat.
“Dei ba ki paidbah ki sngewthuh ba ki la shah ïalam bakla ba ha u 2019 nga la tam da 2000 vote ïa ka kyrtong ba pynïakhun u MLA ba la hiar shuki noh,” u la ong.
U la ong ba ki paidbah ka Mylliem bad ka jylla ki la sngewthuh ba dei tang ka Congress kaba lah ban ai jingshakri kaba hok bad ba janai ïa ki.
“U MLA ba la hiar shuki u la ïalam bakla ïa ki paidbah ka Mylliem ba lada nga jop biang hana ngan pynhap noh ïa ka Mylliem hapoh ki jylli ka MUDA bad ïa kane hi u la pynshai ha assembly,” u la ong.
“Dei haba u jubab ïa ka jingkylli u MLA na Mawlai ba hato kan pynïar ïa ki jylli treikam jong ka, Na ka liang jong u (Hamlet) hi u la jubab Em ba kam dei ka jingshisha halor kane ka mat,” u la bynrap.
Shuh shuh u la ong, “U la thok ïa ki paidbah halor ka mat jong ka MUDA bad un rem ruh halor kane ka mat namar ka ktien ka ju ong wat ju im da ka waitlam namar phin ïap ruh da ka bad wat ju thok ïa u paidbah namar u paidbah ruh un thok kylla ïa phi.”
Haba kren halor ka jingmih noh jong u Bah Hamlet na ka PDF ban ïasoh sha NPP, “Ka pyni ba um don nongrim eiei bad u leit beit sha kata ka pyntha phlang kaban myntoi shimet ma u,” u la ong.
U la ong ba kum ka party kaba la synshar ha ki snem kiba la leit ki kam kiba la leh ka Congress ki la phai khmat bïang sha ka party namar ki sngewthuh kaei ka Congress bad aiu ka la leh.
“Kumba long mynta ki aiñ kiba ap jingma ïa ngi ki rit paid ki la ap lupa bad kaba donkam hi ka dei ba da ki ai1 ban pynkhlaiñ ïa ki jingïada jong ngi bad kum ka party ngin leh ïa kata,” u la ong.