Shillong, Rymphang 07 : U Working President ka UDP, u Bah Paul Lyngdoh, uba ïakhun na Shillong West u la ong ba imat ka UDP kan nym donkam Paralok ban ïateh lok ha kane ka elekshon, namar ba lyer ka beh ba ka UDP kan jop palat 30 ngut.
“Ngin nym ïakren bad no ngin ïateh lok, namar ba haba ngi pynïeng 46 ngut, ngi khmih lynti ban jop lut, namar ba 31 ngut ki la ïoh ban synshar”, la ong u Bah Paul, haba ïakren bad ki nongthoh khubor hadien baladep thep kyrteng.
Halor ka jingkylli ïa ka jingong kiba bun ba kumno ka UDP ka kynnoh tang ïa ka NPP haba ka ïatreilang ha ka sorkar MDA mynta la san snem, u Bah Paul, u la ong ba ha ka sorkar MDA, lada mih noh ka UDP ne lada weng noh ka UDP ruh ka sorkar ka dang neh. Kumta ka UDP kam da ïadon bynta eh bad ka sorkar MDA.
Haba pynphai nia halor ka jingkren laplah u bah Bindo M Lanong ba ka UDP kan ym poi wat tang 10 seat ruh, une u nongïalam u la ong “ Ngam don jingtip halor kata ka jinglum jingkheiñ jongu, ngam tip la u pyndonkam da ka kor komputer, calculator ne kumno ruh. Kumta ai kane ka long ka jingkren jongu ngam kwah ban ïa ktait”. Hynrei tip tang kawei ba ma u (Paul) bad kiwei ki kyrtong ka seng ki long kiba la pynkhreh bha ban ïa aireng. “ Ka Meghalaya ka dei ban pynkhreh ban ïaid ïa ka lynti kaba ar. Ngi la dep rakhe ïa ka jingdap 50 snem bad mynta ka dei ka kabu ïa ka jylla ban ïeng rasong biang na ka sur bad ka mon u paidbah” ong u bah Paul.
Halor ki jingkylli kiei pat ki mat ba thymmai jong ka UDP, u Bah Paul u la ong ba ki mat ba thymmai kidei halor ka bit ka biang jong ki samla, namar ki samla mynta ki don hapdeng ka jinglynga jingpisa kaba jur bad ka jingwan hiar thma u drok bad kiwei de ki jingdih ka sniew kadei ka mat kaba ka Seng kan shimkhia bha halor kane. “Ngi donkam ban peit ban pyndonkam ïa ki samla ba kin lait na kine ki kan sniew”, la ong u nongïalam ka UDP.
Ha kajuh ka por u Bah Paul u la kyntait ba udei u nongsam tiar sha ki paidbah, kumba la kynnoh da iwei ki longkmie ba leit pynphai biang ïa ki tiar ba i ïoh na u. “Ki paidbah ki tip uei u Bah Paul, namar nga la dei u nongïalam ka Seng ki samla pule, nga la thoh kot, nga la thaw jingrwai, thaw poitri bad nga dei ruh u khraw jabieng, ngam dei satia u nongsam tiar”, u la ong, da kaba bynrap ba ban dei ba udei u nongsam tiar un nym jin da la rem ha ka elekshon MLA 2018.
Halor ki jingkynnoh ba ki seng riewlum ki dei kiba khlem bud lum u bah Paul u la ong “ Uwei pa kawei ki don la ka jong ka jong ka jingsngewthuh. Kaei kaba nga kwah ban ong ba ha ka samoi kaba la dep ka UDP ka la shah kyntait ha ki paidbah namar ki pynjop tang 6 na ki 60 ngut ki MLA kumta ban ong ba kam don budlum kam dei namar ki dei ki paidbah ba rai hynrei nga sngewthuh mynta ka kynti ba ki paidbah kin ai ka jingkyrshan kaba pura ba ka UDP kan wan ha ka bor”.
U la ong ruh ba ka jylla Meghalaya ka donkam ban ïoh ïa ka jingsynshar kaba tang da kawei ka seng saiñ hima khnang ban lah ithuh shai kumno ka trei namar lada ka shakri hok ruh la ïoh ïaroh lada ym shakri hok ruh la shah kynthoh bad shah kynnoh.
Halor ka ILP u la ong ba “Phi tip bad phi la ïoh sngew ïa kaei kaba nga la kren ha Assembly. Phi tip ruh ka UDP ka kyrshan ban pyntreikam ïa ka ILP ha ka jylla. Kane ka kam mynta kam dei shuh ha ka jylla ka la dei ha ka sorkar pdeng kumta kaba ngi lah ban leh ka long lada wan ha ka bor ngin ïoh ban leit bud dien ïa kane ka kam sha ka sorkar pdeng sha Delhi ban pynbor ban pyntreikam beit ïaka ILP ha ka jylla jongngi”.
