Ka Civil Sub- Division bad ka Surok ka thong u Bah Himalaya

0

Shillong, Rymphang 07: U kyrtong ka Bharatiya Janata Party (BJP) na Mawsynram, u Bah Himalaya Muktan Shangpliang ha ka sngi Ba-ar la ïathuh ba ka mat ba hakhmat eh kaba u buh thong ban pyndep ha kane ka kynti kaba mynta lada ki paidbah ki ailad biang ïa u ka long ban pynïoh Sub Civil Division ïa ka Mawsynram bad ban shna pynheh ïa ka surok na Mawngap sha Balat.
Haba sha ki lad pathai khubor kren hadien ka jingthep kyrteng, u Bah Shangpliang u ïathuh ba ha kine ki snem ba la leit u la ïakren bad u Myntri Rangbah ka jylla u Conrad K Sangma ban ai Civil Sub-Division ïa ka Block Mawsynram namar ka la dei kawei na ki Block barim tam ha ka jylla khnang ban lah ban wanrah shuh shuh ïa ki kam pynroi hapoh ka thaiñ “hynrei na ka liang ka sorkar bad u Myntri Rangbah kim shym la sngap ïa ka jingtyrwa na ka liang jong nga na ka bynta ka jingmyntoi ki paidbah ka Mawsynram,” u la ong.
U la ong ba wat la u Myntri Rangbah um sngap ïa ka jingdawa Sub Civil Division ïa ka Mawsynram u la ong ba lada ka BJP ka ïoh ban thaw sorkar hadien kane ka ilekshon, un shim ka jingkitkhlieh ban pynthikna ba ka Mawsynram kan ïoh noh da ka Sub Civil Division na ka bynta ban pynbun ïa ki kam pynroi ha Mawsynram.
Shuh shuh u Bah Shangpliang u la ong ruh ba sakawei pat ka mat kaba u la dep ïakren bad buddien na ka sorkar ka dei ban pynheh ïa ka surok na Mawngap shaduh Balat namar kane ka surok ka long ka budlum ïa ki paidbah nongshong shnong ka thaiñ khamtam ïa ki nongrep ban shalan ïa ki mar rep sha ki iew ki hat.
U la ong ruh ba kane ka surok kan kyntiew ïa ka ïoh ka kot ki paidbah namar kan kyntiew ïa ka kam jngohkai pyrthei kaban wanrah pat ïa ki lad ki lynti ban pynmih ïa ki kam kiba thymmai na bynta ka jingmyntoi ki samla.
Haba kren halor ka jingkynthih na kawei ka party sha kawei pat u Bah Shangpliang u la ong ba kane kan nym ktah ïa u ha kane ka ilekshon namar ki paidbah bad ki nongkyrshan hi kiba ïalam lynti ïa u ban ïasoh BJP.
Haba ther ïa ka jingkynnoh ba ka BJP kadei ka Party ba ibeiñ rit paid bad riewngeit Kristan, u Bah Shangpliang u la ong ba kine baroh kidei tang ki jingkynnoh khlem nongrim kiba la kynnoh da kiwei ki party tang naka bynta ban ïoh jingkyrshan na ki paidbah lyngba ka jingïalam bakla pyrshah ïa ka BJP.
U la ong ruh ba ki kam pynroi kiba u Modi ki la leh na bynta ka jylla la lah ban sakhi ha man ki kyndong kynshrot ka jylla bad ki paidbah ruh ki tip bha ïa kane.
“Phin leit sha nongkyndong ki briew kin ïathuh ïa kiei ki kam pynroi kiba u Modi u la leh, kin jer ïa u khaw modi, ka lait modi, ka um modi, ka ïing modi bad bvun bah kiba ngim lah jre hangne bad kane hi ka pyni ba u Modi bad ka BJP la pdiang da ki paidbah ka jylla,” u la ong.

Leave A Reply

Your email address will not be published.