Ngan pynpyrnai ïa ka North Shillong lada nga shah jied kum u MLA : Dr. Aman War

Shillong, Rymphang 07: U Dr. Aman War, kyrtong ka UDP na North Shillong, u la kyntiat ba ka don ka jingbamsap ha ka jingpyllut ban ïakhun pyrshah ïa ka jingpang VOVID 19.
Haba ïakren bad ki nongthoh khubor hadien baladep ban thep kyrteng mynta ka sngi Ba ar , u DHS (MI) barim ka jylla, u la ong ba ka jingkheiñ ba ka tnad treikam ka koit ka khiah ba la pyllut na ka ophis u DHS kam dei satia kumba la kynnoh, namar ba ka DHS ka pynlut tang 248 klur tam. “Kane kadei tang ka jingkynnoh tang ban pynthohbria ïa nga”, u la ong bad bynrap ba kiwei pat ki jingpynlut kidei na kiwei pat ki bor treikam jong ka tnad ka koit ka khiah.
U Dr. War uba la wan ryngkat ka jingsynran ki hajar ngut ki nongkyrshan, u la ong ba kane ka jingpynlut kadei ban thied ïa ki tiar kiba bun kiba donkam namar ba kane ka jingpang ka la wan kynsan kynsan.
Halor ki mat ba un trei na ka bynta ka North Shillong, u Dr. War, u la ong ba lada ki paidbah ki ai ka jingjop ïa u, un peit kyrpang ïa ki Samla khamtam ban pyllait ïa ki na ka jingwan hiar thma jingdih ba sniew. Kawei pat ka long na ka bynta ka jingkyrduh kam kyrduh jam kaba la ban khia shisha ïa ka jingmut jingpyrkhat ki samla bad ki kmie ki kpa.
Shuh shuh u Dr Aman War, ula kular ban pynphyrnai khriak ïa ka constituency kum u ‘Mawlynnai’ lada u shah jied kum u Nongmihkhmat sha ka ïingdorbar Thaw Aiñ ka Jylla.
La synran ïa u da I Kmie, ki bahaïing hasem, ki Nongïalam ka party bad ki nongkyrshan ba da ki hajar ngut.
Shuh shuh haba ïakren bad ki nongthoh khubor, u Dr Aman ula ong ba ka rai jong u ban mih ïakhun ïa kane ka elekshon ban wan ka dei halor ka jingïohi ïa ka jinglong jingman hapoh ka Jylla haba phai sha ka rukom synshar khadar.
“Nga dang shu shongthait kum u Nongtrei Sorkar bad kaei kaba nga la shemphang na ka kam, nga kwah ban wanrah ha ka kam saiñ pyrthei ban lah pynlong ïa ka Jylla kum ka jaka ba itynnad kumba la ïakhun naduh kaba sdang”.
Haba kheiñ ïa ka North Shillong constituency kum u “Mawlynnai bym pat kyrshut pynjlih’ (unpolished diamond), u Dr Aman ula ong “Ngi don ïa ki jaka ïew ha ka constituency jong nga naduh na ïewduh haduh Khyndailad bad ngi donkam ban pynjlih ïa kane bad pynphyrnai kum u Mawlynnai”.
Ula kren ruh halor kiba bun ki ishu kiba ka constituency ka donkam ba kynthup naduh ka pule ka dangle, ka koit ka khiah, ki kam bhalang ha ka imlang sahlang bad kiwei kiwei.
Halor ka jingkynnoh ka Congress ba ula ïohnong bha na ka jyrsieh khlam Covid-19, u Dr Aman ula ong “La jan 30 snem nga la trei hato kam mut ba nga khlem kamai eiei, nga khlem kynshew eiei ïalade na kane ka kamai hok jong nga”.
Haba pynpaw ba ka khlam Covid kala wan kum ka ‘erlangthari, ula ong “..Kumno ka long, kumno ka jah, ka jah kum ka lyer ba jai jai balei, namar baroh ki covid warriors naduh ki Nongïalam saiñ pyrthei haduh kiba rit kyrdan eh kila ïakhun kynthup ki shnong ki shnong. Kila ïakhun tyngeh bha bad ha kato ka por shuwa ban kut ka khlam ha Jylla, nga la ong ba ngi hap ban ïa im lang bad ka jingpang. Haba ki khubor ki mih ba ka jingpang kala sdang khie biang, kam shym la don shuh ka jingkhuslai bad kane ka dei kaei kaba ngi la leh, da ka jingsngewskhem, ngi la bthah ïa ki paidbah ban nang kumno ban im bad kane bad ban long kiba la pynkhreh ïa kaei ka ban jia hadien lada wan lynshop kino kino ki jingpang”.
Une u DHS(MI) barim ula ong ba ka jingpynlut jingsep jong ka DHS(MI) ban ïakhun Covid ha katei ka por ka long kumba T. 248 klur. “Mynta ka jingpynlut ka kot T. 803 klur. Phi hap ban kylli mano kita ki briew kiba donkti bad kane ka T. 803 klur”, ula ong haba bynrap “Ka Sorkar kala buh lut ïa ki jingkheiñ jingdiah hapoh ka ïingdorbar Thaw Aiñ bad bun na ki Dkhot kila buh jingkylli la ki jingkynnoh ki dei kiba shisha, laka don ka jingbym pyndonkam hok hynrei kam don satia. Nga ruh nga tip ïa kane hynrei “Nga kum u DHS (MI) nga pyntip baka Directorate ka pynlut tang T. 248 klur ym T. 803 klur”.
Lah ban kdew hangne ba ka jingpynlut pisa kaba bun eh ha ka jingiakhun ïa ka khlam Covid-19 ka dei ka Tnad National Health Mission (NHM) kaba dei ka Tnad ba pyntreikam ïa ka National Health Mission ka Sorkar Pdeng. Kat kum ki kot ki sla, kane ka Tnad kala pynlut haduh T. 550 klur tam ban ïakhun ïa ka khlam Covid ha Jylla.
Halor ka jingtreikam ka Sorkar MDA, u Dr Aman War ula ong “Ka Sorkar MDA ha kine ki san snem ka dei ka Sorkar MDA hynrei mynta kala dei ka DAM government”.
Ula ong ba ka Jylla ka don shibun ngut ki briew, kiba tbit ban pynïaid ïa ki kam ki jam (good administrator), ki Nongkhaïi, ki Nonghikai bad kam donkam satia ban wad ïa ki briew na shabar ka Jylla ban wanrah ha Jylla.
“Ngi don ïala ki jong ki briew hangne. Nga leit sha Jail Road nga lap ba don bun ki Nonghikai, nga leit sha Oakland, Nga leit sha Jaiaw, Mawkhar, Nongmali- nga la ïoh shibun ki jingnang jingtip da ka jingleit sha kine ki jaka. Hato ngi donkam ban leit shabar ban kyntiew ïala ka jong ka Jylla? Ngim donkam satia. Ngi donkam ïala ki jong ki briew ban kyntiew ïa ka Jylla ha kata ka rukom kaba itynnad hakhmat ki khmat jong ki paidbah jong baroh kawei ka Ri” ula ban jur.
Haba pynpaw ia ka jingsngewskhem ba ka UDP kan ïalam ïa ka Sorkar ba thymmai, u Dr Aman ula ong “Ka lyer jong ka UDP naduh mynta ka sngi kan nang khlaiñ. Haka por ba ngi rung kila ong ba ka UDP ka dei ka party kaba rem hynrei kaei kaba ïohi mynta ka long ba ka UDP ka dei ka party ban jop bad ngin jop bad ngin ïalam ïa ka Sorkar”.
“Da ka jingnang jingtip ba malu mala ba nga la ïoh kum u Nongtrei Sorkar, nga kwah ban pynlong ïa ka Sorkar ba thymmai ba kan burom ïa ki Nongpynïaid ïa ki kam ki jam, ban burom ïa ki Ophisar trai muluk, burom ïa ki kyndon bala buh naduh ki por bala leit noh, ngi la ban nang pynjanai ïa kine hynrei ngim lah ban shu pynduh noh ia baroh” ula bynrap.
Haba kylli halor ka jingïakajia pud, u Dr Aman ula ong “Lada phi ïakren halor ki kam khappud mynta ba ngi la ïoh Jylla, kumno ngi la ïoh ïa kane ka Jylla, hato dei tang ka Sorkar Assam kaba soi bad ong ba kane ka dei ka bynta jong ka Jylla, em! Ka dei kaba la mynjur da ka aiñ ha Parliament bad haba la mynjur, u pud u sam ula shai bha bad nga kwah ban tip bniah kiei kita ki jaka ba ïakajia bad mano ba wanrah ïa kane ka jingïakajia-la ka dei na ka liang ka jong ngi ne kawei pat ka liang-Ngi hap ban khmih biang ïa ka”.