Nga pyndem ha ka bor jong phi u paidbah – ong u Bah Teibor Pathaw

Shillong, K’Lyngkot 05 : U MDC ka NPP na Mawlai Constituency, Bah Teibor Pathaw ha ka janmiet sngi Saitjaiñ u la pynkut noh ïa ka jingïadei bad ka National People’s Party (NPP) hadien ba ki paidbah kiba wan na kylleng ki shnong jong ka constituency ki la pynsawa beit da kawei ka sur ba u dei ban phong noh da ka jersey thymmai ha kane ka elekshon MDC.

Khnang ban ïoh ïa ka sur jong ki paidbah na man la ki shnong jong ka constituency, ki nongïalam ba hakhmat jong u Bah Teibor ki la ailad ïa ki nongïalam na man ki shnong da kaba sdang naduh Mawiongrim bad ter ter shaduh ki bynta ba kham kyndong jong ka Mawlai kata haduh Mawsiatkhnam, Umrynjah bad kiwei kiwei.

Na ka liang ki bor pynïaid ki la pynbna lypa ruh ba hadien ba la ïoh ïa ka jingkren na man la ki shnong u Bah Teibor u dei ban ai ïa ka jubab ha katei hi ka janmiet khnang ba ki paidbah kin shai.

Kumta, hadien ba la ailad ïa uwei/kawei naman la kawei kawei ka shnong, baroh ki pynmih beit da kawei ka sur ba lada u Bah Teibor u kwah ban jop biang u dei ban ieh noh ïa ka party ba rim bad mih aireng kum u kyrtong shimet ha kane ka elekshon MDC.

“Lada phi don shisha ka mynsiem shynrang mih shakhmat bad kum u ‘riewrangbah phi dei ruh ban sngap ïa ka sur jong u paidbah,” ong uwei na ki rangbah ha ka jingïalang kaba long ha Mawlai Nonglum kaba la lum lang da ka Mawlai Social Service Organisation (MSSO).

Uwei pat u rangbah u la ong ba ki paidbah kylleng ka constituency ki ïohi bad ki pyrto ïa ki kam ba u trei na bynta ki duk ki suk hynrei ha kaba khatduh pat kim sngewtynnad ia ka party ba u don. “Kiba la kham stad kham sngewphang ki sngewthuh ia ka jingïapher haba u nongmihkhmat u don ha ka party ba don ha ka bor synshar hynrei kiba bun pat ki paidbah ki sngew artatien lada i Bah Teibor i neh ha kajuh ka party. Kumta, ngi kyrpad ïa i ba in mih ban ïakhun biang ha kane ka elekshon ban wan kum u kyrtong shimet,” u la ong.

Iwei pat i longkmie i la ong ba hadien ba u Bah Teibor u la pynbna ba un ym ïakhun shuh baroh ki la khuslai lut khamtam kiba duk ba suk kiba ju ïohi ïa ki jingïarap na ka kti jong u. “Baroh ngi la sngewsih kthang hynrei haba ngi wan sha ka jingïalang kaba long ha kato ka sngi ngi la sngewkmen bad ïoh mynsiem khyndiat namar ngi la ïoh pat ïa ka jingkular na phi ba phin aireng biang ha kane ka elekshon. Ha shnong Mawlai bun ki paidbah ki bynñiaw lut ïa ka party ba phi don watla ki ieid palat ïa phi, kumta ngi kyrmen ba ha kane ka kynti phin ieng ban ïakhun kum u kyrtong shimet bad ba phin jop biang khnang ba ka shnong Mawlai kan ïohi biang ïa ki kam pynroi,” i la ong.

Uwei pat u rangbah u la ong ba u kwah ban pynkynmaw ba ha shwa ka elekshon MLA ha u snem 2023 ki la donlang ha kajuh ka kynhun hynrei tang na ka daw ba kim sngewtynnad ia ka party ba u Bah Teibor u leit ki la ïakhlad lok noh. Katkum ka jingong jong u, ha ka elekshon MLA 2023 u Bah Teibor u la dei ban jop lada jia ba u sngap bad ïakhun kum u kyrtong shimet.

“Ha u snem 2019 nga la dei uwei na ki nongïalam jongphi bad pynjop ïa phi hynrei ha u snem 2023 ka la mih pat ka jingbym sngewtynnad  namar ngi  kwah ba phin ïakhun bïang kum u kyrtong shimet. Te na kane ka daw nga wan biang mynta ka sngi ban sngap ba lada phi pdiang ïa ka jingtyrwa jong u paidbah ban ïakhun kum u kyrtong shimet, ngan lum bad ïalam biang ïa ki paralok,” u la ong.

Baroh ki nongkren ha kane ka janmiet ki pynsawa beit tang da kawei ka sur, kata ba u Bah Teibor un iehnoh ïa ka party ba rim bad phong noh da ka uniphom kyrtong shimet.

Katba na ka liang u Bah Moris Lyngdoh uwei na ki nongïalam ba hakhmat jong u Bah Teibor haba kren ha kane ka sngi u la ong ba lada ïa khun na kano kano ka party kadei ka uniphom. “Don kiba ong hana tang ba ïakhun Independent hana ba ïakhun tang da ka banian suda bad la law ïa ka uniphom Lada ïa khun kum u kyrtong shimet ruh kadei ka uniphom. Kynmaw lada ïakhun Independent ruh dei ka uniphom kumba la buh ryntih da ka Election Commission jong ka Ri India bad kam dei satia ban shu ïa kren khunlung khynnah.”

Kumta u ong ba ka sur jong baroh ki nong Mawlai kumba la pynsngew ha katei ka janmiet ka long beit ban mih aireng ha kane ka elekshon MDC kaban long ha u Rymphang kum u kyrtong shimet kumba u la jop ha ka elekshon MDC kaba long ha u snem 2019.

Hadien ba la ïoh sngew ïa ka jingkren jong baroh ki paidbah na ka liang u Bah Teibor u la kyntu ïa ki paidbah ba lada ki kwah shisha ba un ïakhun kum u kyrtong shimet ba kin pyni da kaba shu ieng bad kumta baroh ki paidbah ki la ieng lut shriak bad kynhoi risa.

“Paidbah baieid ha kane ka por nga ai ka rai da kaba pyndem ha kamon jong phi u paidbah na bynta kane ka elekshon kaba mynta. U paidbah u donbor halor ka party bad kaba kongsan tam kadei ka bor bad ka mon jongphi. Kumba phi kwah ba ngan ïakhun Independent, kumta mynta hi nga pynbna ba ngan ïakhun kum u kyrtong Independent na ka bynta ka mon jongphi paidbah,” u la ong.

Da kane ka sienjam, u Bah Teibor u la hap pat mynta ban ieh noh ïa ka jinglong dkhot na ka sem NPP bad wat ïa ka shuki Executive Member kaba u bat baroh shi katta kum u MDC ka NPP.