Nga kwah ban kyntiew biang ïa ka bha ka miat jong ka jaitbynriew, ka daw ba ïasoh bad ka NPP: Dr DRL Nonglait

Nongpoh Jymmang 20: U Dr DRL Nonglait u ba dei u kyrtong ka Party NPP naka bynta ka elekshon shiteng samoi ban wan sha ka iing dorbar thawaiñ ka ri ha Parliament u la ong ba ka daw kaba la pynlong ïa u ban rung sha ka seng saiñ pyrthei ka NPP ka dei namar ba u kwah ban kyntiew ïaka bha ka miat jong ka jaitbynriew, ka long ka man, ka suk ka saiñ haka bri u hynniewtrep bad ka jylla baroh kawei ban wanrah ka jingïatylli ym ka jingïapaid, ka jingieid ym ka jingisih, ban wanrah ka jing jai jai ym ka jingbitar, ka jingshong suk ym ka jingïakhih, ka jingbha ym ka jingpynjot.
U la ong ruh ba ka synshar ka khaddar ka dei ka atiar kaba kongsan ban pynim ïaka jaitbynriew kaba imsuk im saiñ, kaba ïatylli bad kaba ïaid shaphrang, ba sa shisien kan long biang ka ri tip briew tip blei kumba la ju tip, ka ri u ñi u kong, ka ri kaba mangi ngi donkam ban ri kyndong namr haka jingtreikam u lap ba kane ka party kala leh shibun kiei kiei kiba kyntiew ïaka bha ka miat haka jylla baroh kawei.
Kum u kyrtong ba pura ka NPP u la ong ba u shim ïa kane ka rai ym naka bynta ka burom shimet hynrei ban bah ïaka lyngkor jong ka jaitbynriew, namar ngan nym duhnong ne iohnong eiei ruh ba ngan long MP namar ngala don lypa ka kam kaba biang hynrei nga shim ïa kane ka jingkitkhlieh naka bynta ka jaitbynriew hynniewtrep bad ban shim ka jingkhlieh naka jingsngewrit bad ka jingsngewkhia.
Nga tip ka kam ka long kaba eh bad kaba jwat hynrei daka jingkyrshan ki paidbah nga ngeit skhem ba ngi lah ban pynlong ktien sorkar noh bad ka ktien khasi kan shah kynthup noh haka khyrnit ba 8 ka riti synshar.
Ngi don bun ki niam bun ki hima, ki elaka, ki raid hynrei tang kawei ka jaitbynriew, bad kaei kaba ngi donkam ka long ban ïatylli kawei bad ban ioh ïaka jinglaitluid haka jingshakri para briew lyngba ki seng niam bad ki nongrim jinggeit ba ngi don.