Shillong, Jymmang 20: Ka sorkar Meghalaya ha ka sngi Balang ka la ong ba ka dang ap ïa ka jingmynjur na ka Karbi Anglong Autonomous Council (KAAC) shwa ban pyntreikam ïa ka jingïateh kular ban rep na ka bynta ka thaiñ khappud Lapangap ha kaba ka jingïakynad ba thymmai ki la mih halor ka hok ban rep.
U Symbud Myntri Rangbah ba peit ïa tnad kam poh ïing, u bah Prestone Tynsong u la ong ba ki heh ka jylla Meghalaya ki la leit jurip ia katei ka jaka ha ka sngi Balang kum shi bynta ban wanrah biang ïa ka jingshong suk shongsain, da kaba bynrap ba ki nongrep ki la rep ha katei ka jaka naduh ki por jong ki long shwa.
U la ong ba u Myntri Rangbah ka jylla u Conrad K Sangma kham mynshwa u la ïa kren bad ka sorkar Assam bad ki dkhot ka KAAC halor kane ka kam.
Katkum ka jingiasngewthuh jingmut, baroh arliang mamla ki la mynjur ban ailad ban rep ïa u kba katkum ka aiom ha katei ka jaka ba la ialeh pyrshah.Hynrei ka Meghalaya ka la pyrshah ïa ki jingthung dieng halor ka nongrim ba ki lah ban lam sha ka jingdawa halor ka jinglong trai ïa ka jaka ha ka bynta khappud kaba la ialeh pyrshah.
U bah Tynsong u la iathuh shuh shuh ba baroh ar tylli ki sorkar ki la mynjur ba ïa kane ka kam yn pynbeit da ka jingiakren hapdeng ki nongshong shnong bad ki khleih nongsynshar jong ki, ym ban tuklar da ki pulit.Ki bor pahara kin dang don ha katei ka jaka haduh ban da wan biang ka jingsuk.
Hynrei ka jingeh ka dang don namar ba ka Meghalaya ka dang ap ïa ka jingmynjur na ka KAAC.U nongaiktien ka sorkar u Wailadmiki Shylla u la kynnoh kham mynshwa ba ka KAAC ka la kynran dien na ka jinglong jong ka ha ka por ba iakren bad kumta ka pynlong ïa ka jingpynbeit ïa ki jingiakynad kaba eh.
Ka Lapangap ka dei kawei na ki bynta kaba ym do ka jingiaka jia pud hapdeng ka Assam bad Meghalaya ha kaba ka jingïakhun halor ka jingpyndonkam ïa ka jaka man ka por ka wanrah ïa ka jingïakynad.
