Shillong, Jymmang 20 : U Myntri ba dei peit ai ka tnad Food Civil Supplies and Consumer Affairs ka sorkar Jylla, Bah Methodius Dkhar ha ka sngi Balang u la ong ba ka jingdon ka lyer shet (domestic LPG) ha ka jylla ka dang biang haduh mynta watla ka don katto katne ka jingduna ha kaba ïadei bad ka suplai ïa ki commercial LPG ne ki tyndong lyer shet ba pyndonkam ha ki jaka kamai.
“Kumba long haduh mynta hi ngi lah ban ong ba ka dang biang,” ong u Myntri haba kren bad ki lad pathai khubor.
Haba pynshai halor ka jingud jong ki paidbah haba ïadei bad ki tyndong lyer shet ha ki iing ki sem u Myntri u la pynshai ba ki jingujor kaba mih ka dei namar ka jingdon ki kyndon ba thymmai ha ka rukom aplai bad kam dei satia kaba ïadei bad ka jingduna ka LPG.
Da kaba ïai ban biang halor kane ka bynta u Myntri u la ong, “Nga kwah ban pynshai ba kam don satia ka jingduna ha ka jingsuplai ïa ka domestic LPG hynrei ka daw ka dei namar ba don ka kyndon kaba ïadei bad ka rukom sam ïa ki.”
Shuh shuh u la ïathuh ba ka jingbuh por man la ka 25 sngi ïa ki nongpyndonkam LPG ban aplai kadei kawei na ki daw ba ki paidbah ki kynduh. U la pynshai ba mynta ki paidbah kiba pyndonkam tyndong lyer shet kin ym lah ban phah pyndap biang (book) ïa ka tyndong lyer shet hapoh ki 25 sngi. Halor kane u kyntu ïa ki paidbah ba ki dei ban don ar tylli ki tyndong lyer khnang ba lada lut kawei, kin dang don sa kawei pat ka tyndong lyer LPG ba la pynap lypa.
Ha kajuh ka por u la kyntu ïa ki paidbah ba ki dei ban pynïasoh ïa ki mobile number jong ki bad ka system kaba dei bad ki jaka sam tyndong lyer shet khnang ba kan ym buh jingeh ïa ki ban ïoh ïa ki DSC number.
Nalorkata, u Myntri u la kyntu ïa ki paidbah haba ki kynduh ïa kino kino ki jingeh ba kidei ban leit mih sha ki jaka ba ju sam ïa kitei ki tyndong lyer shet lane lyngba ki toll free number.
